'വിശപ്പിന്റെ വിളി" അറിഞ്ഞു ഭക്ഷണം ഓർഡർ ചെയ്യുന്ന എ ഐ ഉപകരണം ;മംഗളൂരു സ്വദേശി ശ്രദ്ധേയനാകുന്നു

 മംഗളൂരു: വയറിലെ വിശപ്പ് തിരിച്ചറിഞ്ഞ് ഓൺലൈനിൽ ഭക്ഷണം ഓർഡർ ചെയ്യുന്ന, ആർട്ടിഫിഷ്യൽ ഇന്റലിജൻസ് (AI) പിന്തുണയോടെ പ്രവർത്തിക്കുന്ന ഒരു ഉപകരണം നിർമ്മിച്ച് ശ്രദ്ധേയനാവുകയാണ് മംഗളൂരു സ്വദേശിയും സ്റ്റാർട്ടപ്പ് സ്ഥാപകനുമായ സോഹൻ എം. റായ്. "എനിക്ക് വിശക്കുമ്പോൾ മനസിലാക്കുകയും സൊമാറ്റോയിൽ ഓട്ടോമാറ്റിക്കായി ഭക്ഷണം ഓർഡർ ചെയ്യുകയും ചെയ്യുന്ന ഒരു ഉപകരണം ഞാൻ കണ്ടുപിടിച്ചു," എന്നാണ് തന്റെ വീഡിയോയിൽ അദ്ദേഹം അവകാശപ്പെടുന്നത്.

'MOM' പ്രവർത്തിക്കുന്നത് ഇങ്ങനെ:

'MOM' (Meal Ordering Module) എന്ന് പേരിട്ടിരിക്കുന്ന ഈ ഉപകരണം അദ്ദേഹം ബെൽറ്റിൽ ഘടിപ്പിച്ചാണ് ഉപയോഗിക്കുന്നത്. ഇതിന്റെ പ്രവർത്തനരീതി റായ് വിശദീകരിക്കുന്നുണ്ട്.

• ഹാർഡ്‌വെയർ: ഉപകരണത്തിന്റെ ഹാർഡ്‌വെയറിനായി, സഹോദരിയുടെ സ്റ്റെതസ്കോപ്പ് ഉൾപ്പെടെയുള്ള വസ്തുക്കളാണ് റായ് ഉപയോഗിച്ചത്.
  
  
• വിശപ്പ് തിരിച്ചറിയൽ: വയറിലെ ഇരമ്പൽ ശബ്ദം ഉപകരണം കൃത്യമായി തിരിച്ചറിയുന്നു.
  
  

• AI വിശകലനം: ശബ്ദം തിരിച്ചറിഞ്ഞ ശേഷം, 'ക്ലോഡ് AI' (Claude AI) ഉപയോഗിച്ച് തന്റെ വിശപ്പിന്റെ തോത് നിർണ്ണയിക്കുന്നു.
  
  

• ഓർഡറിംഗ്: വിശപ്പ് വേണ്ടത്രയുണ്ടെന്ന് AI കണ്ടെത്തിയാൽ, ഉപകരണം ഓട്ടോമാറ്റിക്കായി സൊമാറ്റോ വഴി ഭക്ഷണം ഓർഡർ ചെയ്യുന്നു.

സോഷ്യൽ മീഡിയ പ്രതികരണങ്ങൾ:

ഈ നൂതന കണ്ടുപിടിത്തത്തെ സാമൂഹിക മാധ്യമങ്ങൾ കൗതുകത്തോടെയാണ് വരവേറ്റത്.

•  "ഇതെങ്ങനെയാണ് പരീക്ഷിച്ചത്?" എന്ന ഒരു സാമൂഹ്യ മാധ്യമ ഉപഭോക്താവിന്റെ ചോദ്യത്തിന് : "ഒരു ദിവസം മുഴുവൻ ഭക്ഷണം കഴിക്കാതെ ഇരിക്കേണ്ടി വന്നു."എന്നായിരുന്നു സോഹന്റെ മറുപടി 
  
  
• മറ്റൊരാൾ: "വയറ്റിലെ ഇരമ്പൽ  വിശപ്പ് കൊണ്ട് മാത്രമാവില്ല  , എങ്കിലും നല്ല ശ്രമം." റായ് ഇതിന് മറുപടി നൽകിയത്: "എനിക്ക് വിശക്കുമ്പോൾ മാത്രമാണ് ഈ ശബ്ദം വരുന്നത്. അതുകൊണ്ട് എനിക്കിത് പ്രയോജനകരമാണ്."
  
  
• "ആവശ്യമില്ലാത്ത കണ്ടുപിടിത്തങ്ങളുടെ പട്ടികയിൽ ഇത് ഉൾപ്പെടുത്തണം," എന്നതായിരുന്നു മറ്റൊരു കമന്റ്.
  
  
• ഉപകരണം ചെറുതും ഭാരം കുറഞ്ഞതുമായിരുന്നെങ്കിൽ പൂച്ചയെ നിരീക്ഷിക്കാൻ എളുപ്പമാകുമായിരുന്നു എന്ന് ഒരാൾ അഭിപ്രായപ്പെട്ടു.
•  ആരാണ് സോഹൻ എം. റായ്?

സാങ്കേതികവിദ്യയുമായി ബന്ധപ്പെട്ട വിവിധ വീഡിയോകൾ പങ്കുവെക്കുന്ന "zikiguy" എന്ന ഇൻസ്റ്റാഗ്രാം പേജ് നടത്തുന്നത് മംഗളൂരു സ്വദേശിയായ സോഹൻ എം. റായ് ആണ്. സഹ്യാദ്രി കോളേജ് ഓഫ് എഞ്ചിനീയറിംഗ് ആൻഡ് മാനേജ്‌മെന്റിൽ നിന്ന് ബിരുദം നേടിയ ശേഷം വിവിധ ടെക് കമ്പനികളിൽ ഇന്റേൺഷിപ്പ് പൂർത്തിയാക്കി സ്വന്തമായി സ്റ്റാർട്ടപ്പ് ആരംഭിച്ച വ്യക്തിയാണ് അദ്ദേഹം.

മുൻകാല പരീക്ഷണം: 2023-ൽ സ്വയം നിർമ്മിച്ച ഡ്രോൺ ഉപയോഗിച്ച് സൊമാറ്റോ ഡെലിവറി ബോയിയായി ഭക്ഷണം എത്തിച്ച് റായ് വൈറലായിരുന്നു. പൈലറ്റില്ലാതെ ഒരു പിസ്സ വീട്ടിലെത്തിക്കാൻ കഴിയുന്ന ഓട്ടോണമസ് ഡ്രോൺ നിർമ്മിക്കുക എന്ന ലക്ഷ്യത്തോടെയായിരുന്നു ഈ പരീക്ഷണം. സുരക്ഷാ മുൻകരുതലുകൾ എടുത്ത് 'ജുഗാഡ്' (തദ്ദേശീയമായ പരിഹാരം) വഴി നിർമ്മിച്ച ഡ്രോൺ ആണിത് എന്നും വാണിജ്യാടിസ്ഥാനത്തിൽ ഇത് കൂടുതൽ മെച്ചപ്പെടുത്താൻ സാധിക്കുമെന്നും അന്ന് അദ്ദേഹം കുറിച്ചിരുന്നു.