ചായക്കടക്കാരൻ സൈബർ കുറ്റവാളി: ഒരു കോടി രൂപയും സ്വർണ്ണാഭരണങ്ങളും പിടിച്ചെടുത്തു

 ഗോപാൽഗഞ്ച് (ബിഹാർ): സംസ്ഥാനാന്തര സൈബർ കുറ്റകൃത്യ ശൃംഖലയിൽ പങ്കുണ്ടെന്ന് ആരോപിച്ച് ചായക്കട നടത്തിപ്പുകാരന്റെ വീട്ടിൽ നിന്ന് ഒരുകോടിയിലധികം രൂപയും വലിയ അളവിൽ സ്വർണ്ണാഭരണങ്ങളും ബിഹാർ പോലീസ് പിടിച്ചെടുത്തു. സംഭവവുമായി ബന്ധപ്പെട്ട് രണ്ട് സഹോദരങ്ങളെ പോലീസ് അറസ്റ്റ് ചെയ്തു.

ഒക്ടോബർ 17 വെള്ളിയാഴ്ച രാത്രി ലഭിച്ച രഹസ്യവിവരത്തെ തുടർന്ന്, അമൈത്തി ഖുർദ് ഗ്രാമത്തിലെ ഒരു വീട്ടിൽ പോലീസ് റെയ്ഡ് നടത്തി. പരിശോധനയിൽ, 1,05,49,850 രൂപ പണമായും, 344 ഗ്രാം സ്വർണ്ണവും, 1.75 കിലോ വെള്ളിയും, ഓൺലൈൻ തട്ടിപ്പുകളുമായി ബന്ധപ്പെട്ട നിരവധി രേഖകളും ഉപകരണങ്ങളും പിടിച്ചെടുത്തു.

സൈബർ ഡി.എസ്.പി. അവന്തിക ദിലീപ് കുമാർ നൽകുന്ന വിവരം അനുസരിച്ച്, പിടിച്ചെടുത്തവയിൽ 85 എ.ടി.എം. കാർഡുകൾ, 75 ബാങ്ക് പാസ്ബുക്കുകൾ, 28 ചെക്ക് ബുക്കുകൾ, ആധാർ കാർഡുകൾ, രണ്ട് ലാപ്ടോപ്പുകൾ, മൂന്ന് മൊബൈൽ ഫോണുകൾ, ഒരു ആഢംബര കാർ എന്നിവയും ഉൾപ്പെടുന്നു.

ദുബായിൽ നിന്ന് നിയന്ത്രണം

പ്രധാന പ്രതിയായ അഭിഷേക് കുമാർ, മുൻപ് ഒരു ചെറിയ ചായക്കട നടത്തിയിരുന്ന വ്യക്തിയാണ്. എന്നാൽ, പിന്നീട് ഇയാൾ സൈബർ കുറ്റകൃത്യ റാക്കറ്റിൽ ചേരുകയായിരുന്നു. തുടർന്ന് ദുബായിലേക്ക് താമസം മാറിയ ഇയാൾ അവിടെയിരുന്നാണ് തട്ടിപ്പ് പ്രവർത്തനങ്ങൾ നിയന്ത്രിച്ചിരുന്നത്. സഹോദരനായ ആദിത്യ കുമാർ ഇന്ത്യയിൽ പണമിടപാടുകളും മറ്റു കാര്യങ്ങളും കൈകാര്യം ചെയ്തുവരികയായിരുന്നു.

"തട്ടിപ്പിലൂടെ ലഭിക്കുന്ന പണം പല ബാങ്ക് അക്കൗണ്ടുകളിലേക്ക് മാറ്റുകയും പിന്നീട് അത് പണമാക്കി മാറ്റുകയുമാണ് ഈ സംഘം ചെയ്തിരുന്നതെന്ന് പ്രാഥമിക അന്വേഷണത്തിൽ വ്യക്തമായി," ഡി.എസ്.പി. അവന്തിക ദിലീപ് കുമാർ അറിയിച്ചു.

അന്വേഷണം ഇതര സംസ്ഥാനങ്ങളിലേക്ക്

ഈ ശൃംഖല ബിഹാറിനു പുറത്തും മറ്റ് സംസ്ഥാനങ്ങളുമായി ബന്ധമുള്ളതായും പോലീസ് സംശയിക്കുന്നു. സംഘവുമായി ബന്ധമുള്ള മറ്റുള്ളവരെ കണ്ടെത്താനുള്ള ശ്രമങ്ങൾ പുരോഗമിക്കുകയാണ്. പിടിച്ചെടുത്ത മിക്ക ബാങ്ക് പാസ്ബുക്കുകളും ബെംഗളൂരുവിൽ നിന്നുള്ളവയാണെന്ന് കണ്ടെത്തിയതിനെ തുടർന്ന്, അന്വേഷണം ഇതര സംസ്ഥാനങ്ങളിലേക്ക് വ്യാപിപ്പിക്കാൻ അന്വേഷണ ഉദ്യോഗസ്ഥർ തീരുമാനിച്ചു. ഈ അക്കൗണ്ടുകൾ ഏതെങ്കിലും ദേശീയ തലത്തിലുള്ള സൈബർ ശൃംഖലയുമായി ബന്ധിപ്പിച്ചിട്ടുണ്ടോ എന്നും പരിശോധിക്കുന്നുണ്ട്.

റെയ്ഡിനെത്തുടർന്ന്, പണത്തിന്റെ ഉറവിടം കണ്ടെത്താനും സംഘടിത സൈബർ കുറ്റകൃത്യങ്ങളുമായുള്ള ബന്ധം പരിശോധിക്കാനുമായി ആദായനികുതി വകുപ്പിലെയും തീവ്രവാദ വിരുദ്ധ സ്ക്വാഡിലെയും (ATS) ഉദ്യോഗസ്ഥരും അന്വേഷണത്തിൽ പങ്കുചേർന്നു. അറസ്റ്റിലായ അഭിഷേക് കുമാറിനെയും ആദിത്യ കുമാറിനെയും രണ്ട് ദിവസമായി ചോദ്യം ചെയ്തുവരികയാണ്. പിടിച്ചെടുത്ത ഉപകരണങ്ങളിലെ വിവരങ്ങൾ വിശകലനം ചെയ്ത് കൂടുതൽ കണ്ണികളെ കണ്ടെത്താനുള്ള ശ്രമത്തിലാണ് പോലീസ്.