ലേഡീസ് ട്രിപ്പ്' കെണിയായി; സുഹൃത്തിൻ്റെ യഥാർത്ഥ ലക്ഷ്യം ഞെട്ടിച്ചു: യുവതിയുടെ വെളിപ്പെടുത്തൽ

 ബെംഗളൂരു: സോഷ്യൽ മീഡിയയിലെ 'ലേഡീസ് ട്രിപ്പ്' പരസ്യങ്ങളിൽ ആകൃഷ്ടരായി പോകുന്ന സ്ത്രീകൾക്ക് മുന്നറിയിപ്പുമായി യുവതിയുടെ ഫേസ്ബുക്ക് പോസ്റ്റ് ശ്രദ്ധേയമാകുന്നു. 'ഓൺലി ഗേൾസ് ട്രിപ്പ്' എന്ന് പറഞ്ഞ് പരിചയപ്പെട്ട സുഹൃത്തിൻ്റെ യഥാർത്ഥ ലക്ഷ്യം ഞെട്ടിക്കുന്നതായിരുന്നുവെന്നും, സുരക്ഷിതമല്ലാത്ത ഇത്തരം യാത്രകളിൽ നിന്ന് സ്ത്രീകൾ അകന്നുനിൽക്കണമെന്നും യുവതിയുടെ വെളിപ്പെടുത്തലിൽ പറയുന്നു.

ഐ.എ.എസ്. പഠനത്തെക്കുറിച്ചും മറ്റും ചർച്ച ചെയ്തിരുന്ന സുഹൃത്തിൻ്റെ ലക്ഷ്യം ലൈംഗികവൃത്തിക്ക് തന്നെ ഉപയോഗിക്കുക എന്നതായിരുന്നുവെന്നും, കൂട്ടികൊടുക്കുന്നവരെപ്പോലെ പ്രവർത്തിക്കുന്നവരിൽ നിന്ന് സ്ത്രീകൾ ശ്രദ്ധിക്കണമെന്നും യുവതി തുറന്നെഴുതുന്നു.

പോസ്റ്റിന്റെ പൂർണ്ണരൂപം share/p/1CtU1e3zPz/

സംഭവം ഇങ്ങനെ: ക്ഷണിച്ചവരുടെ ലക്ഷ്യം മറ്റൊന്ന്

ഫേസ്ബുക്കിൽ കണ്ട 'ട്രിപ്പ് പോകാൻ താല്പര്യമുള്ള ലേഡീസ് ഉണ്ടോ? ഓൺലി ഗേൾസ്' എന്ന പോസ്റ്റ് കണ്ടാണ് യുവതി ഒരു യാത്രാ ഗ്രൂപ്പിൽ ചേർന്നത്. തുടക്കത്തിൽ നിരവധി പേർ ഗ്രൂപ്പിലുണ്ടായിരുന്നെങ്കിലും പിന്നീട് കണ്ണൂർ, എറണാകുളം, ബെംഗളൂരു എന്നിവിടങ്ങളിൽ നിന്നുള്ള മൂന്ന് പേർ മാത്രമായി ഗ്രൂപ്പ് ചുരുങ്ങി.

പുതുവർഷത്തോട് അനുബന്ധിച്ച് കണ്ണൂരുകാരിയായ സുഹൃത്ത് ബെംഗളൂരുവിലെത്തി, തൻ്റെ വീട്ടിൽ താമസസൗകര്യം ഒരുക്കാമോ എന്ന് യുവതിയോട് ആവശ്യപ്പെട്ടു. കൂടെ വരുന്നത് ആൺസുഹൃത്തുക്കളാണെന്ന് അറിഞ്ഞതോടെ യുവതി ഇത് നിരസിച്ചു. സ്വന്തം വീട്ടിൽ താമസിക്കാൻ ബുദ്ധിമുട്ടുണ്ടെന്നും പുറത്ത് റൂം എടുത്ത് താമസിക്കണമെന്നും യുവതി ആവശ്യപ്പെട്ടു.

ഇതിനു പിന്നാലെയാണ് ഞെട്ടിക്കുന്ന വെളിപ്പെടുത്തലുകൾ സുഹൃത്ത് നടത്തിയത്. കൂടെയുള്ളത് തൻ്റെ 'സിംഗിനാപ്പി' (boy friend) ആണെന്നും, കൂടാതെ വരുന്ന മറ്റൊരാൾക്ക് ഒരു 'ഗേൾഫ്രണ്ടിനെ' ആവശ്യമുണ്ടെന്നും പറഞ്ഞ് യുവതിയെ ക്ഷണിക്കുകയായിരുന്നു. ഇത് നിരസിച്ചപ്പോൾ, എറണാകുളംകാരിയും വിവാഹിതയാണെന്നും അവർ ഭർത്താവറിയാതെ മറ്റ് ആൺസുഹൃത്തുക്കളോടൊപ്പം കറങ്ങാറുണ്ടെന്നും പറഞ്ഞുകൊണ്ട് സമ്മർദ്ദം ചെലുത്താൻ സുഹൃത്ത് ശ്രമിച്ചു.

വ്യക്തിഹത്യയും ഭീഷണിയും

സുഹൃത്തിൻ്റെ മോശം ആവശ്യങ്ങൾക്ക് വഴങ്ങാതിരുന്നതോടെ വാട്സാപ്പ് ഗ്രൂപ്പിൽ ബഹളമുണ്ടായി. "വെറുതെ അല്ലെടീ നിനക്ക് കെട്ടിയോൻ ഇല്ലാത്തത്. നീ ജീവിതകാലം മുഴുവൻ ആണുങ്ങൾ കൂട്ടിനില്ലാതെ നിൻ്റെ കൊച്ചിന് തന്തയില്ലാതെ പോകുമെന്ന്" അടക്കം മോശമായ രീതിയിൽ സുഹൃത്ത് തന്നെ അധിക്ഷേപിച്ചെന്ന് യുവതി പറയുന്നു. ഇരുവരും തമ്മിൽ കടുത്ത വാക്കുതർക്കമുണ്ടായ ശേഷം സുഹൃത്ത് ബ്ലോക്ക് ചെയ്യുകയും ചെയ്തു.

പരസ്പരം ചതിച്ച വില്ലത്തി

സംഭവങ്ങളെക്കുറിച്ച് എറണാകുളംകാരിയെ വിളിച്ചപ്പോൾ ലഭിച്ച വിവരമാണ് യുവതിയെ കൂടുതൽ ഞെട്ടിച്ചത്. കണ്ണൂരുകാരി, യുവതിയെക്കുറിച്ച് പറഞ്ഞിരുന്ന അതേ മോശം കാര്യങ്ങൾ തന്നെയായിരുന്നു എറണാകുളംകാരിയെക്കുറിച്ചും യുവതിയോട് പറഞ്ഞിരുന്നത്. അതായത്, പരസ്പരം അറിയിക്കാതെ ലൈംഗികവൃത്തിക്ക് വേണ്ടി 'ഫ്ളക്സിബിൾ' ആക്കി എടുക്കുകയായിരുന്നു കണ്ണൂരുകാരിയുടെ ലക്ഷ്യം.

"വിളിച്ച തെറി ഒട്ടും വെറുതെയായില്ല" എന്നും സുഹൃത്തിൻ്റെ ഇരട്ടത്താപ്പ് മനസ്സിലാക്കിയ എറണാകുളംകാരി അഭിപ്രായപ്പെട്ടു. തങ്ങൾ തുറന്നു സംസാരിച്ചില്ലായിരുന്നെങ്കിൽ കണ്ണൂരുകാരിയുടെ കളികൾക്ക് ഇരയായി പരസ്പരം തെറ്റിദ്ധരിച്ച് മുന്നോട്ട് പോകുമായിരുന്നുവെന്നും യുവതി പറയുന്നു.

സുരക്ഷിതയാത്രയുടെ പ്രാധാന്യം

'ലേഡീസ് ട്രിപ്പ്' എന്ന പേരിൽ ആരെങ്കിലും വിളിക്കുമ്പോൾ കൂടെയുള്ളവർ 'കൂട്ടികൊടുക്കുന്ന' ആൾക്കാരല്ലെന്ന് ഉറപ്പാക്കണമെന്നും യുവതി മുന്നറിയിപ്പ് നൽകുന്നു. കുടുംബത്തെ മറന്നുള്ള ഒന്നും ശാശ്വതമല്ലെന്ന് ഓർക്കണം. വിശ്വസ്തരും സുരക്ഷിതരുമായ ആളുകളോടൊപ്പം മാത്രം യാത്രകൾ തിരഞ്ഞെടുക്കുക.

വ്യക്തിപരമായ അനുഭവത്തിൻ്റെ പശ്ചാത്തലത്തിൽ, പൊതുജന താൽപര്യത്തിനായിട്ടാണ് താൻ ഈ കാര്യങ്ങൾ പങ്കുവെക്കുന്നതെന്നും യുവതി കൂട്ടിച്ചേർത്തു.