ഗാസയിൽ ബന്ദിയാക്കപ്പെട്ട നേപ്പാളി വിദ്യാർത്ഥി ബിപിൻ ജോഷി മരിച്ചു; രണ്ടുവർഷത്തെ കാത്തിരിപ്പ് വിഫലം

 ജെറുസലേം: ഹമാസ് ബന്ദിയാക്കിയ നേപ്പാളുകാരനായ കാർഷിക വിദ്യാർത്ഥി ബിപിൻ ജോഷി കൊല്ലപ്പെട്ടതായി സ്ഥിരീകരിച്ചു. 2023 ഒക്ടോബർ ഏഴിന് ഹമാസ് നടത്തിയ ആക്രമണത്തിന് മൂന്നാഴ്ച മുൻപ് മാത്രം ഇസ്രായേലിൽ എത്തിയ 23 വയസ്സുകാരനായ ജോഷി, ജീവിച്ചിരിപ്പുണ്ടെന്ന പ്രതീക്ഷയാണ് ഏകദേശം രണ്ട് വർഷങ്ങൾക്കിപ്പുറം ഇല്ലാതായത്.

ഇനി ജീവനുള്ള ബന്ദികൾ തങ്ങളുടെ പക്കലില്ലെന്ന് ഹമാസ് തിങ്കളാഴ്ച പ്രഖ്യാപിച്ചതിന് പിന്നാലെയാണ്, ഏറെക്കാലം ജീവനോടെയുണ്ടെന്ന് വിശ്വസിക്കപ്പെട്ടിരുന്ന ജോഷിയുടെ മരണം ഇസ്രായേൽ സ്ഥിരീകരിച്ചതും മൃതദേഹം വീണ്ടെടുത്തുവെന്ന വിവരവും പുറത്തുവന്നത്.

ഗാസ അതിർത്തിയോട് ചേർന്നുള്ള കിബ്ബൂട്‌സ് അലുമിമിൽ (Kibbutz Alumim) നൂതന കാർഷിക സാങ്കേതിക വിദ്യകൾ പഠിക്കുക എന്ന സ്വപ്നവുമായാണ് ജോഷി ഇസ്രായേലിൽ എത്തിയത്. താനും മറ്റ് 16 നേപ്പാളി വിദ്യാർത്ഥികളും ലോകത്തിലെ ഏറ്റവും വലിയ സംഘർഷ മേഖലകളിലൊന്നിന്റെ അതിർത്തിയിലാണ് എത്തിയതെന്ന് തിരിച്ചറിയാതെയായിരുന്നു ആ യുവാവിന്റെ പ്രതീക്ഷയോടെയുള്ള യാത്ര.

ഒക്ടോബർ ഏഴിന് ഹമാസ് ഭീകരർ കിബ്ബൂട്സിലേക്ക് അതിക്രമിച്ചു കയറിയപ്പോൾ ജോഷിയുടെ പത്ത് സഹപാഠികൾ കൊല്ലപ്പെട്ടു. അക്രമിസംഘം തങ്ങളുടെ അടുത്തെത്തുന്നതിന് തൊട്ടുമുമ്പ്, തായ് തൊഴിലാളികൾക്കൊപ്പം ഒരു ഷെൽട്ടറിൽ കൂട്ടംകൂടി നിൽക്കുന്ന ചിത്രം ഈ സംഘത്തെക്കുറിച്ചുള്ള അവസാന ദൃശ്യങ്ങളിൽ ഒന്നായിരുന്നു.

അവിടെയുണ്ടായിരുന്ന ഏക നേപ്പാളി രക്ഷപ്പെട്ടയാളായ ഹിമാഞ്ചൽ കട്ടേലിന്റെ വെളിപ്പെടുത്തൽ അനുസരിച്ച്, തീവ്രവാദികൾ ഷെൽട്ടറിനുള്ളിലേക്ക് ഗ്രനേഡ് എറിഞ്ഞപ്പോൾ ബിപിൻ ജോഷി അത് കൈകൊണ്ട് തട്ടിയെടുത്ത് പുറത്തേക്ക് എറിഞ്ഞ്, കട്ടേലിന്റെ ജീവൻ രക്ഷിച്ചു. ഈ ആക്രമണത്തിൽ പരിക്കേറ്റ ജോഷിയെ രണ്ട് തായ് തൊഴിലാളികൾക്കൊപ്പം ഹമാസ് ബന്ദിയാക്കുകയായിരുന്നു.

പിന്നീട് കിബ്ബൂട്സ് നിരീക്ഷണ ക്യാമറയിൽ പതിഞ്ഞ ദൃശ്യങ്ങളാണ് ജോഷിയെക്കുറിച്ച് അവസാനമായി ലഭിച്ച സൂചന. ബന്ദികളാക്കിയവർ അദ്ദേഹത്തെ ഗാസയിലേക്ക് കൊണ്ടുപോകുന്ന ദൃശ്യമായിരുന്നു അത്. ജോഷിയെ പിടികൂടിയ സ്ഥലത്ത് അലുമിം നിവാസികൾ പിന്നീട് നേപ്പാളി പതാക സ്ഥാപിച്ചു.

നേപ്പാളിന്റെ പടിഞ്ഞാറൻ ഗ്രാമത്തിലുള്ള അദ്ദേഹത്തിന്റെ കുടുംബം മാസങ്ങളോളം ചെറിയ വിവരങ്ങൾക്കായിപോലും കാത്തിരുന്നു. 17 വയസ്സുള്ള സഹോദരി പുഷ്പ, സഹായം അഭ്യർത്ഥിച്ച് കാഠ്മണ്ഡുവിലേക്ക് എട്ട് മണിക്കൂർ യാത്ര ചെയ്ത് അധികൃതരെ സമീപിച്ചു. ഓഗസ്റ്റ് മാസത്തിൽ കുടുംബം ഇസ്രായേൽ സന്ദർശിക്കുകയും ഇസ്രായേൽ പ്രസിഡന്റ് ഐസക് ഹെർസോഗുമായി കൂടിക്കാഴ്ച നടത്തുകയും ചെയ്തു. ടെൽ അവീവിലെ ഹോസ്റ്റേജ് സ്ക്വയറിൽ ഇസ്രായേലി ബന്ദികളുടെ ചിത്രങ്ങൾക്കൊപ്പം അവർ ബിപിന്റെ ഫോട്ടോയുമേന്തി പ്രതിഷേധങ്ങളിൽ പങ്കുചേർന്നു.

2023 നവംബറോടെ ചിത്രീകരിച്ച ഒരു വീഡിയോയിൽ ജോഷിയെ ജീവനോടെ കണ്ടതോടെ അവരുടെ പ്രതീക്ഷകൾക്ക് വീണ്ടും ജീവൻ വച്ചിരുന്നു. എന്നാൽ, അതിനുശേഷം ജീവിച്ചിരിക്കുന്നു എന്നതിന് മറ്റൊരു തെളിവും ലഭിച്ചില്ല.

തിങ്കളാഴ്ച, ജീവിച്ചിരിക്കുന്ന എല്ലാ ബന്ദികളെയും വിട്ടയക്കുന്നതിനുള്ള പുതിയ വെടിനിർത്തൽ കരാറിന്റെ ഭാഗമായി ഹമാസ് 20 ബന്ദികളെ മോചിപ്പിച്ചെങ്കിലും ജോഷി അവരിൽ ഇല്ലായിരുന്നു. അദ്ദേഹം മരിച്ചെന്നും മൃതദേഹം കണ്ടെടുത്തെന്നും ഇസ്രായേൽ സ്ഥിരീകരിക്കുകയായിരുന്നു. മരണം സ്ഥിരീകരിക്കുന്നതിന് മുൻപ് വരെ, ഗാസയിൽ ജീവിച്ചിരിപ്പുണ്ടെന്ന് വിശ്വസിച്ചിരുന്ന ഏക ഇസ്രായേലി ഇതര ബന്ദി ബിപിൻ ജോഷിയായിരുന്നു.

നേപ്പാളിലെ അദ്ദേഹത്തിന്റെ ഗ്രാമത്തിൽ, ധീരതയുടെയും എന്നാൽ പൂർത്തിയാകാതെ പോയ മടങ്ങിവരവിന്റെ വാഗ്ദാനത്തിന്റെയും ഓർമ്മപ്പെടുത്തലായി ഒരു ചെറിയ ആരാധനാലയത്തിൽ അദ്ദേഹത്തിന്റെ ചിത്രവും നേപ്പാളി പതാകയും ഇപ്പോൾ സ്ഥാപിച്ചിട്ടുണ്ട്.

ഹമാസിന്റെ ഒക്ടോബർ 7-ലെ ആക്രമണത്തോടെ ആരംഭിച്ച യുദ്ധം 1,200 പേരുടെ മരണത്തിലും 251 പേരുടെ തട്ടിക്കൊണ്ടുപോകലിലുമാണ് കലാശിച്ചത്. തുടർന്നുണ്ടായ സംഘർഷത്തിൽ ഇതുവരെ 67,000-ത്തിലധികം ഫലസ്തീനികൾ കൊല്ലപ്പെട്ടതായി അസോസിയേറ്റഡ് പ്രസ് ഗാസ ആരോഗ്യ മന്ത്രാലയത്തെ ഉദ്ധരിച്ച് റിപ്പോർട്ട് ചെയ്യുന്നു.