പാലക്കാട്: ലോകപ്രശസ്തമായ ലണ്ടനിലെ നാച്ചുറൽ ഹിസ്റ്ററി മ്യൂസിയം സംഘടിപ്പിച്ച 'വൈൽഡ് ലൈഫ് ഫോട്ടോഗ്രാഫർ ഓഫ് ദി ഇയർ' മത്സരത്തിൽ, തൃത്താല സ്വദേശിയായ വിദ്യാർത്ഥിക്ക് അഭിമാനകരമായ നേട്ടം. 11-14 വയസ്സ് വിഭാഗത്തിൽ റണ്ണറപ്പ് സ്ഥാനം നേടിയത് തൃത്താല മേഴത്തൂർ അമ്മാത്തിൽ വീട്ടിൽ നിന്നുള്ള ഋത്വേദ് ഗിരീഷാണ് (14).
രണ്ട് വർഷം മുൻപ് മേഴത്തൂരിൽ വെച്ച് ഋത്വേദ് പകർത്തിയ തേനീച്ചകളുടെ സൂക്ഷ്മ ചിത്രത്തിനാണ് അന്താരാഷ്ട്ര പുരസ്‌കാരം ലഭിച്ചത്. 90 രാജ്യങ്ങളിൽ നിന്നായി അറുപതിനായിരത്തോളം എൻട്രികളാണ് മത്സരത്തിന് പരിഗണിച്ചത്.
നിലവിൽ കുടുംബത്തോടൊപ്പം യുഎഇയിൽ താമസിക്കുന്ന ഋത്വേദ്, ദുബായ് ജെംസ് ഔവർ ഇന്ത്യൻ സ്കൂളിലെ ഒൻപതാം ക്ലാസ് വിദ്യാർത്ഥിയാണ്. വൈൽഡ് ലൈഫ് ഫോട്ടോഗ്രാഫറായ അമ്മ ദീപാ ഗിരീഷിൽ നിന്നാണ് ഋത്വേദ് ക്യാമറയോടുള്ള കമ്പം തുടങ്ങുന്നത്. കോവിഡ് കാലത്താണ് ഋത്വേദ് ചിത്രങ്ങൾ പകർത്തിത്തുടങ്ങുന്നത്.
മാക്രോ ഫോട്ടോഗ്രഫിയിലെ പ്രതിഭ
വന്യജീവികളുടെ ചിത്രമെടുക്കാൻ അമ്മ ദീപ നാട്ടിൽ വരുമ്പോൾ മകനെയും കൂടെക്കൂട്ടിയിരുന്നു. കുഞ്ഞുകാര്യങ്ങളെ സൂക്ഷ്മതയോടെ ഒപ്പിയെടുക്കുന്ന മാക്രോ ഫോട്ടോഗ്രഫിയോടാണ് ഋത്വേദിന് പ്രത്യേക താൽപ്പര്യം.
ലണ്ടനിലെ ഈ പുരസ്‌കാരത്തിന് പുറമേ, ഈ വർഷത്തെ എക്സ്പോഷർ അന്താരാഷ്ട്ര ഫോട്ടോഗ്രാഫി പുരസ്‌കാരവും ഇതേ ചിത്രത്തിന് ലഭിച്ചിട്ടുണ്ട്. മുൻ വർഷവും ഇതേ മത്സരത്തിൽ ഋത്വേദ് രണ്ടാം സമ്മാനം നേടിയിരുന്നു. 'വൈൽഡ് ലൈഫ് ഫോട്ടോഗ്രാഫർ ഓഫ് ദി ഇയർ' പോർട്ട്‌ഫോളിയോ പുസ്തകത്തിൽ ഋത്വേദിൻ്റെ ചിത്രങ്ങൾ പ്രസിദ്ധീകരിച്ചിട്ടുണ്ട്. നിക്കോൺ ഡി 850 ക്യാമറയും സിഗ്മയുടെ മാക്രോ ലെൻസും ഉപയോഗിച്ചാണ് സമ്മാനാർഹമായ ചിത്രം പകർത്തിയത്.
സാങ്കേതിക മാനേജരായ ഗിരീഷ് കുമാറാണ് പിതാവ്. ദുബായിലെ അൽ കുദ്ര പോലുള്ള സ്ഥലങ്ങളിൽ പോലും ഋത്വേദ് സജീവമായി ഫോട്ടോഗ്രഫിയിൽ ഏർപ്പെടുന്നുണ്ട്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.