ആർ.എസ്.എസ്. പഥസഞ്ചലനം: ചിറ്റാപൂർ മണ്ഡലത്തിൽ വിലക്ക് നീക്കി കോടതി വിധി; കർണാടക സർക്കാരിന് തിരിച്ചടി

ബെംഗളൂരു: രാഷ്ട്രീയ ശ്രദ്ധ നേടാൻ നിരന്തരം അപക്വ പ്രസ്താവനകൾ നടത്തുന്ന കർണാടക സംസ്ഥാന മന്ത്രി പ്രിയങ്ക് ഖാർഗെയുടെ മണ്ഡലമായ ചിറ്റാപൂരിൽ പഥസഞ്ചലനം നടത്താൻ രാഷ്ട്രീയ സ്വയംസേവക സംഘത്തിന് (ആർ.എസ്.എസ്.) അനുമതി നൽകിയ ഹൈക്കോടതി വിധി കോൺഗ്രസ് സർക്കാരിന് കനത്ത തിരിച്ചടിയായി. ക്രമസമാധാനനില മുൻനിർത്തി ആർ.എസ്.എസ്. ഘോഷയാത്രക്ക് അനുമതി നിഷേധിച്ച സംസ്ഥാന സർക്കാർ നിലപാടാണ് കോടതി തള്ളിയത്.

കോടതി വിധിയെ സ്വാഗതം ചെയ്തുകൊണ്ട് ബി.ജെ.പി. സംസ്ഥാന പ്രസിഡന്റ് ബി.വൈ. വിജയേന്ദ്ര സോഷ്യൽ മീഡിയയിൽ ശക്തമായ പ്രതികരണമാണ് രേഖപ്പെടുത്തിയത്. "ജനാധിപത്യ അവകാശങ്ങൾ കവർന്നെടുക്കാൻ ശ്രമിച്ച കോൺഗ്രസ് സർക്കാരിനെതിരായ ഹൈക്കോടതിയുടെ വിധി ഭരണഘടനയുടെ അന്തസ്സ് ഉയർത്തിപ്പിടിച്ചു," വിജയേന്ദ്ര പ്രസ്താവിച്ചു.

'സ്വേച്ഛാധിപത്യ ഭരണത്തിന് സ്ഥാനമില്ല'

കോടതി വിധി ജനാധിപത്യ സംവിധാനത്തിൽ സ്വേച്ഛാധിപത്യ ഭരണത്തിന് സ്ഥാനമില്ലെന്ന വ്യക്തമായ സന്ദേശം നൽകിയിട്ടുണ്ടെന്നും, "പകൽ വെളിച്ചത്തിൽ ഭരണഘടനയെക്കുറിച്ച് അസംബന്ധം പറയുന്നവർക്ക് ഉചിതമായ പാഠമാണ്" ലഭിച്ചിരിക്കുന്നതെന്നും വിജയേന്ദ്ര ആരോപിച്ചു. ചിറ്റാപൂരിൽ ആർ.എസ്.എസ്. ഘോഷയാത്ര തടയാൻ ശ്രമിച്ചവർക്കുള്ള വ്യക്തമായ മറുപടിയാണ് ഈ വിധിയെന്നും അദ്ദേഹം കൂട്ടിച്ചേർത്തു.

നിയമപരവും സമാധാനപരവുമായ സാഹചര്യങ്ങളിൽ സാംസ്കാരിക, പൊതുജന അവബോധ പരിപാടികൾക്ക് അനുമതി നൽകേണ്ടത് സർക്കാരിന്റെ കടമയാണ്. എന്നാൽ, ക്രമസമാധാനത്തിന്റെ പേരിൽ ജനാധിപത്യ സംവിധാനത്തെ ശ്വാസം മുട്ടിക്കാൻ ശ്രമിച്ചാൽ രാജ്യത്തിന്റെ ഭരണഘടന അത് അനുവദിക്കില്ലെന്ന സന്ദേശമാണ് ഈ വിധി നൽകുന്നത്. "ദേശസ്നേഹമുള്ള സംഘടനകളെ ചവിട്ടിമെതിക്കുക എന്ന കോൺഗ്രസിന്റെ വഞ്ചനാപരമായ നയം കോടതി വിധിയിലൂടെ നിഷ്പ്രഭമായിരിക്കുന്നു," വിജയേന്ദ്ര കുറ്റപ്പെടുത്തി.

ചിറ്റാപൂരിൽ ഇപ്പോൾ ആരംഭിച്ചിരിക്കുന്നത് സ്വേച്ഛാധിപത്യ ഭരണവും ജനാധിപത്യവും തമ്മിലുള്ള പോരാട്ടമാണെന്ന് അദ്ദേഹം വ്യക്തമാക്കി. ഭരണഘടനയെയും ജനാധിപത്യത്തെയും സംരക്ഷിക്കാനുള്ള ഈ പോരാട്ടം ഭാരതീയ ജനതാ പാർട്ടി ഒരു വെല്ലുവിളിയായി ഏറ്റെടുക്കുമെന്നും ബി.ജെ.പി. സംസ്ഥാന പ്രസിഡന്റ് പ്രഖ്യാപിച്ചു.