ട്രംപ് പ്രഖ്യാപിച്ച അധികതീരുവ യുഎസിനു തന്നെ തിരിച്ചടി ,ട്രംപിന്റെ നടപടി ഇന്ത്യയെ റഷ്യയുമായും ചൈനയുമായും കൂടുതൽ അടുപ്പിക്കും ; മുൻ സുരക്ഷാ ഉപദേഷ്ടാവ് ജോൺ ബോൾട്ടൻ

വാഷിങ്ടൻ : റഷ്യയിൽനിന്ന് എണ്ണ ഇറക്കുമതി ചെയ്യുന്നതിന് ഇന്ത്യയ്ക്കെതിരെ ‍ഡോണൾഡ്   ട്രംപ് പ്രഖ്യാപിച്ച അധികതീരുവ   യുഎസിനു  തന്നെ തിരിച്ചടിയാകുമെന്ന് മുൻ സുരക്ഷാ ഉപദേഷ്ടാവ് ജോൺ ബോൾട്ടൻ. ട്രംപിന്റെ നടപടി ഇന്ത്യയെ റഷ്യയുമായും ചൈനയുമായും കൂടുതൽ അടുപ്പിക്കുമെന്നും യുഎസിനെതിരെ ഈ മൂന്നു രാജ്യങ്ങളും ഒന്നിക്കുമെന്നും ജോൺ ബോൾട്ടൻ പറഞ്ഞു.

‘‘തീരുവ വർധന യുഎസിനെ സംബന്ധിച്ചിടത്തോളം ‘ഏറ്റവും മോശം ഫലം’ ആണ് നൽകുന്നത്. റഷ്യയിൽനിന്നും ചൈനയിൽനിന്നും ഇന്ത്യയെ അകറ്റാനായി യുഎസ് പതിറ്റാണ്ടുകളായി ശ്രമിക്കുകയായിരുന്നു. ഈ നീക്കത്തെയും തീരുവ നടപടി ദുർബലപ്പെടുത്തും. ഈ നീക്കം യുഎസിന് വൻ തിരിച്ചടിയാകും. ഇന്ത്യയുമായുള്ള ബന്ധം വഷളാക്കിയത് യുഎസിന്റെ ഒരു പ്രധാന ലക്ഷ്യത്തെ തന്നെ ദുർബലപ്പെടുത്തി.’’ – സിഎൻഎന്നിനോട് സംസാരിക്കവെ ബോൾട്ടൻ പറഞ്ഞു.

ട്രംപിന് ചൈനയോട് മൃദുസമീപനമാണെന്നും ബോൾട്ടൻ ആരോപിക്കുന്നു. ‘‘ചൈനീസ് പ്രസിഡന്റ് ഷി ജിൻപിങ്ങുമായി ‘കരാർ’ ഒപ്പിടാനുള്ള ധൃതിയിൽ ട്രംപ് യുഎസിന്റെ തന്ത്രപരമായ താൽപര്യങ്ങളെ ബലികഴിക്കുകയാണ്. ഈ നീക്കത്തിലൂടെ പുട്ടിന് തന്റെ അജൻഡ മുന്നോട്ടു കൊണ്ടുപോകാനും ഇന്ത്യയ്ക്കു മേൽ യുഎസ് അടിച്ചേൽപ്പിച്ച തീരുവയെ ഒരു വലിയ തന്ത്രത്തിന്റെ ഭാഗമായി ഉപയോഗിക്കാനും അവസരം നൽകും.’’ – ബോൾട്ടന്‍ പറഞ്ഞു.