ദുബായിൽ പുതിയ ആഡംബര ദ്വീപ് 'നയ്യ' വരുന്നു ; ദ്വീപിന്റെ രൂപരേഖയും പുറത്ത്‌

ദുബായ്: എമിറേറ്റിൽ പുതിയ ആഡംബര ദ്വീപ് വരുന്നു. ദുബായ് ആസ്ഥാനമായുള്ള നിക്ഷേപ സ്ഥാപനമായ ഷമാൽ ഹോൾഡിങ്സ് ആണ് ‘നയ്യ’ എന്നപേരിൽ പുതിയ ആഡംബര ദ്വീപ് ഒരുക്കുന്നത്. ബുധനാഴ്ച ദ്വീപിന്റെ രൂപരേഖയും പുറത്തുവിട്ടിരുന്നു.

പദ്ധതിമേഖലയിലെ വിനോദസഞ്ചാരത്തിന് കൂടുതൽ കരുത്തുപകരുമെന്നാണ് പ്രതീക്ഷ. പുത്തൻ ശൈലിയിൽ നിർമിക്കുന്ന ദ്വീപിൽ സ്യൂട്ടുകളുടെയും സ്വകാര്യ വില്ലകളുടെയും വലിയൊരു നിരതന്നെയുണ്ടായിരിക്കും. ഓരോന്നിനും സ്വകാര്യ ബീച്ച് ആക്സസും ലഭ്യമാകും.

ജുമൈരയുടെ തീരപ്രദേശത്തോട് ചേർന്നുകിടക്കുന്ന ഈ ദ്വീപിൽ പ്രകൃതിയോട് ഇണങ്ങിയുള്ള ജീവിതശൈലിയായിരിക്കും ഒരുക്കുക. ദുബായിലെ പ്രധാന റോഡുകളുമായും ഈ താമസയിടം ബന്ധിപ്പിക്കും. താമസക്കാർക്കും സന്ദർശകർക്കും ഒരുപോലെ സ്വകാര്യത പ്രദാനംചെയ്യുകയെന്നാണ് പദ്ധതിയുടെ പ്രധാന ലക്ഷ്യമെന്നും അധികൃതർ വ്യക്തമാക്കി.