മിയ കീവന് അന്ത്യാഞ്ജലി: ജീവിതം ധീരമായി ജീവിച്ചവൾ

അയർലാൻഡ്  , ബെൽഫാസ്റ്റ് സംഗീതോത്സവത്തിനിടെ രോഗബാധിതയായി മരണമടഞ്ഞ 17 വയസ്സുകാരിയായ മിയ കീവന്റെ വേർപാട് കരിക്ക്-ഓൺ-സ്യൂറിലെ ജനങ്ങളെ ദുഃഖത്തിലാഴ്ത്തി. ടിപ്പററിയിലെ സെന്റ് നിക്കോളാസ് പള്ളിയിൽ നടന്ന അവളുടെ സംസ്കാര ചടങ്ങിൽ, ധീരയും, സ്നേഹനിധിയും, ഉത്സാഹഭരിതയുമായ ഒരു കൗമാരക്കാരിയായാണ് മിയയെ എല്ലാവരും അനുസ്മരിച്ചത്. സ്വന്തം ജീവിതം ധൈര്യപൂർവ്വം ജീവിച്ചും താൻ കണ്ടുമുട്ടിയ എല്ലാവരിലും സ്വാധീനം ചെലുത്തിയും മിയ മുന്നോട്ട് പോയെന്ന് അവളുടെ സഹോദരി പറഞ്ഞു. യുവാക്കൾ തങ്ങൾ എടുക്കുന്ന തീരുമാനങ്ങളെക്കുറിച്ച് ചിന്തിക്കാനും പരസ്പരം ശ്രദ്ധിക്കാനുമുള്ള ഒരു അഭ്യർത്ഥനയും ഈ ദുഃഖാചരണവേളയിൽ ഉയർന്നു കേട്ടു.

തിളക്കമുള്ള ജീവിതം, നിറമുള്ള ഓർമ്മകൾ

കഴിഞ്ഞ വാരാന്ത്യത്തിൽ ബെൽഫാസ്റ്റിലെ എമേർജ് ഫെസ്റ്റിവലിൽ വെച്ചാണ് മിയയ്ക്ക് അസുഖം ബാധിച്ചത്. തുടർന്ന് ആശുപത്രിയിൽ വെച്ച് അവൾ മരണത്തിന് കീഴടങ്ങി. ശനിയാഴ്ച നടന്ന സംസ്കാര ചടങ്ങിൽ, തിളക്കമുള്ള നിറങ്ങളിലുള്ള വസ്ത്രങ്ങൾ ധരിച്ചാണ് ആളുകൾ എത്തിയത്. ഈ വേർപാട് ജനങ്ങളെ ഞെട്ടിച്ചുവെന്ന് പറഞ്ഞുകൊണ്ട് ഫാദർ പോൾ വാൾഡ്രോൺ ശുശ്രൂഷ ആരംഭിച്ചു.

മിയയുടെ സഹോദരി ക്യാ കീവൻ, മിയയെക്കുറിച്ച് ഓർമ്മകൾ പങ്കുവെച്ചു. "പ്രിയപ്പെട്ടവളും, സ്നേഹനിധിയും, ജീവിതത്തോട് അങ്ങേയറ്റം ആവേശമുള്ളവളും" മിയ തൻ്റെ ചിന്തകൾ തുറന്നുപറയാൻ മടികാണിക്കാത്ത വ്യക്തിയായിരുന്നു. മറ്റുള്ളവർ അത് ഇഷ്ടപ്പെട്ടാലും ഇല്ലെങ്കിലും, അവൾക്ക് പറയാനുള്ളത് അവൾ പറയും. തൻ്റെ ഇഷ്ടക്കേടുകൾ അവൾ മറച്ചുവെച്ചിരുന്നില്ല.. ആ സത്യസന്ധതയായിരുന്നു അവളുടെ ആകർഷണീയതയുടെ ഭാഗം," ക്യാ പറഞ്ഞു."എത്ര ദേഷ്യത്തിലായിരുന്നാലും, മിയയെ കണ്ടാൽ ചിരിക്കാതിരിക്കാൻ സാധിക്കുമായിരുന്നില്ല," ക്യാ ഓർത്തു. "കാരണം, വഴക്ക് തീരും മുമ്പ് തന്നെ അവൾ അടുത്ത കാര്യങ്ങളെക്കുറിച്ച് ആലോചിച്ച് തുടങ്ങും."

മിയക്ക് വലിയ സ്വപ്നങ്ങളുണ്ടായിരുന്നു. അടുത്തയിടെയാണ് അവൾ തന്റെ ആദ്യ കാർ വാങ്ങിയത്. അത് അവളുടെ 'അഭിമാനവും സന്തോഷവു'മായിരുന്നു. മരണശേഷം അവളുടെ പുതിയ കാറിന്റെ ലോഗ് ബുക്ക് വീട്ടിലെത്തിയിരുന്നു. "അവൾ ഒരിക്കലും വിദ്വേഷം വെച്ച് പുലർത്തിയിരുന്നില്ല. ഒരു നിമിഷം ഞങ്ങൾ വഴക്കിടാം, അടുത്ത നിമിഷം ഒന്നും സംഭവിക്കാത്തതുപോലെ അവൾ മറ്റെന്തെങ്കിലും സംസാരിച്ചുകൊണ്ടേയിരിക്കും. അവൾ ആഴത്തിൽ സ്നേഹിച്ചു, അത് നമുക്ക് അനുഭവിക്കാൻ കഴിയുമായിരുന്നു. അവൾ തികച്ചും വിശ്വസ്തയായിരുന്നു," ക്യാ ഓർമ്മിച്ചു.

മിയയെ അനുസ്മരിച്ചുകൊണ്ട് ഫാദർ വാൾഡ്രോൺ പറഞ്ഞു, "മിയ ജീവിതത്തിലൂടെ നിശബ്ദമായി കടന്നുപോയ ഒരു വ്യക്തിയായിരുന്നില്ല, അവൾ ഓടുകയും നൃത്തം ചെയ്യുകയും മുന്നോട്ട് കുതിക്കുകയും ചെയ്തു. അവൾക്ക് സ്വപ്നങ്ങൾ കാണാനുള്ള കഴിവ് മാത്രമല്ല, അവയെ പിന്തുടരാനുള്ള ധൈര്യവും ഉണ്ടായിരുന്നു."

മിയയുടെ വേർപാട് സഹിക്കാൻ കഴിയുന്ന ഒന്നല്ല. എങ്കിലും, അവളുടെ ആത്മാവും, ചിരിയും, സത്യസന്ധതയും, സ്വപ്നങ്ങളും, സ്നേഹവും എന്നും നമ്മോടൊപ്പം ഉണ്ടാകുമെന്ന് ക്യാ ഉറപ്പിച്ചു പറഞ്ഞു. തുടർന്ന് സെന്റ് മേരീസ് സെമിത്തേരിയിൽ മിയയുടെ സംസ്കാര ചടങ്ങുകൾ നടന്നു.