കള്ളിക്കാട് തട്ടിക്കൊണ്ടു പോയ യുവാവിനെ പോലീസ് കണ്ടെത്തി

നെയ്യാർഡാം:  കള്ളിക്കാട് പെട്രോൾ പമ്പിൽ വെച്ച് ഇന്നലെയാണ് യുവാവിനെ അക്രമിസംഘം തട്ടിക്കൊണ്ടുപോയത്.

കാട്ടാക്കട മയിലോട്ടുമൂഴിയിൽ വാടകയ്ക്ക് താമസിക്കുന്ന ബിജു തങ്കച്ചനെയാണ്(36) ഒരു സംഘം ആളുകൾ തട്ടിക്കൊണ്ടു പോയത്. കളിക്കാട് പെട്രോൾ പമ്പിൽ ഞായറാഴ്ച ഉച്ചയ്ക്ക് നാലു മണിയോടെ വാഹനത്തിന് പെട്രോൾ അടിക്കാനായി എത്തിയതായിരുന്നു ബിജു. പെട്രോൾ അടിച്ചുകൊണ്ടിരിക്കുന്നതിനിടെ പതിനഞ്ചോളം പേർ കാർ വളയുകയാ യിരുന്നു. പിന്നാലെ ബിജുവിനെ വാഹനത്തിൽ നിന്ന് വലിച്ചിറക്കി മർദ്ദിച്ചു. കാറിന്റെ പിന്നിലുള്ള സീറ്റിലേക്ക് ഇയാളെ വലിച്ചിടുകയും ചെയ്തു. കുറച്ചുപേർ വാഹനത്തിൽ കയറി ബിജുവിനെയും കൊണ്ട് കള്ളിക്കാട് ഭാഗത്തേക്ക് പോയി.

നാട്ടുകാർ വിവരമിയിച്ചതിനെത്തുടർന്ന് കാട്ടാക്കട പോലീസ് സംഭവസ്ഥലത്തെത്തി സിസിടിവി ദൃശ്യങ്ങൾ പരിശോധിച്ചു. പനച്ചമൂട് സ്വദേശിയായ ബിജുവും കുടുംബവും മൈലോട്ടുമൂഴിയിലെ വാടക വീട്ടിൽ ഒമ്പത് മാസത്തോളമായി താമസിച്ചു വരികയാണ്. ഇയാൾ നെയ്യാറ്റിൻകരയിൽ റാബിയ ഇന്ത്യ പ്രൈവറ്റ് ലിമിറ്റഡ് എന്ന സ്ഥാപനം നടത്തിവരുകയാണ്. പിന്നാലെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ ആര്യനാട് വച്ച് ബിജുവിനെ കാറിൽ കണ്ടെത്തുകയാ യിരുന്നു. തട്ടിക്കൊണ്ടുപോകാനുണ്ടായ കാരണവും പ്രതികളെ സംബന്ധിച്ചും തുടരന്വേഷണം നടക്കുന്നു.