പ്രതിരോധ രംഗത്തെ നാഴികക്കല്ല് : എഎച്ച് -64 ഇ അപ്പാച്ചെ ഹെലികോപ്റ്ററുകള്‍ സേനയുടെ ഭാഗമായി

ന്യൂഡൽഹി : പ്രതിരോധരംഗത്ത് സുപ്രധാന ചുവടുവയ്പ്പുമായി ഇന്ത്യൻ സൈന്യം. പതിനാറു മാസത്തെ കാത്തിരിപ്പിനൊടുവിൽ എഎച്ച് -64 ഇ അപ്പാച്ചെ ഹെലികോപ്റ്ററുകള്‍ സേനയുടെ ഭാഗമായി. ബോയിങ് കമ്പനിയുമായുള്ള കരാറിന്റെ ഭാഗമായുള്ള ആദ്യ മൂന്നു ഹെലികോപ്റ്ററുകളാണ് ഇന്ത്യൻ സൈന്യത്തിന് ലഭിച്ചത്. പ്രതിരോധ രംഗത്തെ നാഴികക്കല്ലാണ് എഎച്ച് – 64 ഇ അപ്പാച്ചെ ഹെലികോപ്റ്ററിന്റെ വരവെന്ന് പ്രതിരോധ മന്ത്രി രാജ്നാഥ് സിങ് പറഞ്ഞു.

ഗാസിയാബാദിലെ ഹിൻഡൺ വ്യോമതാവളത്തിലേക്കാണ് യുഎസ് സൈനിക കാർഗോ വിമാനത്തിൽ ഹെലികോപ്റ്ററുകൾ എത്തിച്ചത്. ആറ് എഎച്ച് – 64 ഇ അപ്പാച്ചെ ഹെലികോപ്റ്ററുകള്‍ക്കായാണ് ഇന്ത്യ ബോയിങുമായി കരാർ ഒപ്പിട്ടത്. 2020ൽ 4100 കോടി രൂപയ്ക്കാണ് ഇന്ത്യ 6 ഹെലികോപ്ടറുകൾക്ക് ഓർഡർ നൽകിയത്. ബാക്കി മൂന്ന് ഹെലികോപ്ടറുകൾ ഈ വർഷം അവസാനത്തോടെ എത്തുമെന്നാണ് പ്രതീക്ഷ.

2023 ഓഗസ്റ്റിലാണ് യുഎസിലെ അരിസോണയിലെ മേസ കേന്ദ്രത്തിൽ ഇന്ത്യൻ സൈന്യത്തിനായി ബോയിങ് കമ്പനി അപ്പാച്ചെ ഹെലികോപ്ടറുകളുടെ നിർമാണം ആരംഭിച്ചത്. 2020ൽ, ഇന്ത്യൻ വ്യോമസേനയ്ക്ക് 22 ആർ- മോഡൽ അപ്പാച്ചെ ഹെലികോപ്ടറുകൾ ബോയിങ് കൈമാറിയിരുന്നു. ഇതിനു പിന്നാലെയാണ് ആറ് എഎച്ച് – 64 ഇ അപ്പാച്ചെ ഹെലികോപ്റ്ററുകൾക്കുള്ള ഓർഡർ കൂടി നൽകിയത്. പുതിയതായി എത്തിയ എഎച്ച് – 64 ഇ അപ്പാച്ചെ ഹെലികോപ്റ്ററുകൾ പാക്ക് അതിർത്തിയിൽ വിന്യസിക്കാനാണ് നീക്കം. നിലവിലുള്ള വ്യോമസേനയുടെ 22 അപ്പാച്ചെ ഹെലികോപ്റ്ററുകൾക്ക് പുറമെയാണ്, സൈന്യത്തിന്റെ എഎച്ച് – 64 ഇ ഹെലികോപ്ടറുകൾ കൂടി മേഖലയിൽ വിന്യസിക്കുന്നത്. ഇതോടെ പാക്ക് അതിർത്തിയിൽ സൈന്യത്തിന്റെ കരുത്ത് ഇരട്ടിയാകും.

ലോകത്തിലെ ഏറ്റവും നൂതനവും കഴിവുതെളിയിച്ചതുമായ ആക്രമണ ഹെലികോപ്റ്റർ എന്നാണ് ബോയിങ് കമ്പനി തന്നെ എഎച്ച് – 64 ഇ അപ്പാച്ചെ ഹെലികോപ്റ്ററുകളെ വിശേഷിപ്പിക്കുന്നത്. എഎച്ച് – 64 ഇ ഹെലികോപ്റ്ററുകൾ യുഎസ് സൈന്യത്തിന്റെ നട്ടെല്ലാണെന്നാണ് ഈ രംഗത്തെ വിദഗ്ധർ പറയുന്നത്. 2800 അടിയിൽ കൂടുതൽ ഉയരത്തിൽ പറക്കാൻ എഎച്ച് – 64 ഇ ഹെലികോപ്റ്ററുകൾക്ക് കഴിയും. യുഎസ് സൈന്യത്തിനും മറ്റു രാജ്യങ്ങൾക്കുമായി 2700-ലധികം എഎച്ച് – 64 ഇ അപ്പാച്ചെ ഹെലികോപ്റ്ററുകൾ ഇതുവരെ ബോയിങ് നിർമിച്ചിട്ടുണ്ട്. യുഎസിനും ഇന്ത്യയ്ക്കും പുറമെ, ഈജിപ്ത്, ഗ്രീസ്, ഇന്തൊനീഷ്യ, ഇസ്രയേൽ, ജപ്പാൻ, ദക്ഷിണ കൊറിയ, കുവൈത്ത്, നെതർലൻഡ്‌സ്, ഖത്തർ, സൗദി അറേബ്യ, സിംഗപ്പുർ, യുഎഇ, യുകെ എന്നീ രാജ്യങ്ങള്‍ക്കും എഎച്ച് – 64 ഇ ഹെലികോപ്റ്ററുകൾ സ്വന്തമായുണ്ട്.