ക്ഷേത്രമേളയ്ക്കിടെ ആകാശത്തേക്ക് തോക്ക് ചൂണ്ടി വെടിയുതിർത്തതിനെ തുടർന്ന് സന്തോഷ് ജാർക്കിഹോളിക്കെതിരെ കേസ്

ബെളഗാവി: ഗോകക്കില്‍ ക്ഷേത്രമേളയ്ക്കിടെ ആകാശത്തേക്ക് തോക്ക് ചൂണ്ടി വെടിയുതിർത്തതിനെ തുടർന്ന് ബിജെപി എംഎൽഎയും മുൻ മന്ത്രിയുമായ രമേശ് ജാർക്കിഹോളിയുടെ മകൻ സന്തോഷ് ജാർക്കിഹോളിക്കെതിരെ പൊലീസ് കേസെടുത്തു. ആകാശത്തേക്കു വെടിയുത്തിർക്കുന്ന വിഡിയോ ദൃശ്യങ്ങൾ പുറത്തുവന്നതിനെ തുടർന്നാണ് നടപടി.

ശനിയാഴ്ച ബെളഗാവി ജില്ലയിലെ ഗോകക്കില്‍ ലക്ഷ്മി ദേവി ക്ഷേത്രത്തിലെ ഉത്സവത്തിനിടെയായിരുന്നു സംഭവം. ജനക്കൂട്ടത്തിനിടയിൽനിന്ന് സന്തോഷ് ആകാശത്തേക്കു വെടിയുതിർത്ത് ആഘോഷിക്കുന്ന ദൃശ്യങ്ങളാണ് പുറത്തുവന്നത്. തുടർന്ന് ഗോകക്ക് ടൗണ്‍ പൊലീസ് സന്തോഷ് ജാർക്കിഹോളിക്കെതിരെ എഫ്ഐആർ റജിസ്റ്റര്‍ ചെയ്തു.

പൊതുനിരത്തിൽ നിയമവിരുദ്ധമായി തോക്ക് ഉപയോഗിച്ചതിനാണ് കേസെടുത്തിരിക്കുന്നത്. സന്തോഷ് ജാർക്കിഹോളിയെ ചോദ്യം ചെയ്യാൻ വിളിപ്പിച്ചേക്കുമെന്ന് ഉദ്യോഗസ്ഥർ പറഞ്ഞു.