ഇന്റർ മയാമിയുടെ തകർപ്പൻ വിജയത്തിൽ തിളങ്ങി ലയണൽ മെസ്സി.

മേജർ ലീ​ഗ് സോക്കറിൽ തുടർച്ചയായ രണ്ടാം മത്സരത്തിലും തകർപ്പൻ വിജയവുമായി ഇന്റർ മയാമി. രണ്ട് ​ഗോളും രണ്ട് അസിസ്റ്റുകളുമായി തിളങ്ങിയ ഇതിഹാസ താരം ലയണൽ മെസ്സിയുടെ മികവാണ് മയാമിയുടെ വിജയത്തിന് പിന്നിൽ.

കൊളംബസ് ക്രൂവിനെ ഒന്നിനെതിരെ അഞ്ച് ​ഗോളുകൾക്കാണ് മയാമി വിജയിച്ചത്. ടാഡിയോ അല്ലെൻഡെ, ലൂയിസ് സുവാരസ്, ഫാഫ പിക്കോൾട്ട് എന്നിവരും മയാമിക്കായി വലചലിപ്പിച്ചു. മത്സരത്തിന്റെ 13-ാം മിനിറ്റിൽ തന്നെ ആദ്യ ​ഗോൾ പിറന്നു. ലയണൽ മെസ്സിയുടെ അസിസ്റ്റിൽ അർജന്റീനയിൽ നിന്നുള്ള താരം കൂടിയായ ടാഡിയോ അല്ലെൻഡെയാണ് ആദ്യ ​ഗോൾ നേടിയത്.

15-ാം മിനിറ്റിൽ മെസ്സിയുടെ ആദ്യ ​ഗോൾ പിറന്നു. ​ഗോൾ പോസ്റ്റിന് പുറത്ത് കിട്ടിയ പന്ത് ഇടംകാൽ കൊണ്ട് തട്ടി മെസ്സി വലയിലാക്കി. തൊട്ടുപിന്നാലെ 24-ാം മിനിറ്റിലും മെസ്സി വലചലിപ്പിച്ചു. ആദ്യ പകുതി പിന്നിടുമ്പോൾ എതിരില്ലാത്ത മൂന്ന് ​ഗോളിന് മെസ്സിയും സംഘവും മുന്നിലായിരുന്നു. രണ്ടാം പകുതിയിൽ 58-ാം മിനിറ്റിൽ സീസർ റുവൽകാബ കൊളംബസ് ക്രൂവിനായി ആദ്യ ​ഗോൾ നേടി.

എന്നാൽ മെസ്സിയെയും സംഘത്തെയും തടയാൻ ഈ ​ഗോൾ പോരായിരുന്നു. 64-ാം മിനിറ്റിൽ ലൂയിസ് സുവാരസ് വലചലിപ്പിച്ചു. പിന്നാലെ 89-ാം മിനിറ്റിൽ മെസ്സിയുടെ രണ്ടാമത്തെ അസിസ്റ്റിൽ ഫാഫ പിക്കോൾട്ട് വലകുലുക്കിയതോടെ മയാമിയുടെ വിജയം കൂടുതൽ ആധിപത്യപരമായി. 

വിജയത്തോടെ മേജർ ലീ​ഗ് സോക്കർ പോയിന്റ് ടേബിളിൽ ഇന്റർ മയാമി മൂന്നാം സ്ഥാനത്തേയ്ക്ക് ഉയർന്നു. 16 മത്സരങ്ങളിൽ നിന്ന് എട്ട് വിജയവും അഞ്ച് സമനിലയും മൂന്ന് തോൽവിയും ഉൾപ്പെടെ 29 പോയിന്റാണ് മയാമി നേടിയിരിക്കുന്നത്.