യുകെയില്‍ വെക്കേഷന്‍ ആസ്വദിക്കുന്ന ഒട്ടേറെ ചിത്രങ്ങളും വിഡിയോകളുമായി ബോളിവുഡ് നടി കൃതി സനോണ്‍

തിരക്കേറിയ പ്രോജക്റ്റുകള്‍ ഒന്നും ഇല്ലാത്തപ്പോള്‍ ലോകം മുഴുവനും യാത്ര ചെയ്യുന്ന ആളാണ്‌ ബോളിവുഡ് നടി കൃതി സനോണ്‍. ആരാധകര്‍ ഏറെ പ്രതീക്ഷയോടെ കാത്തിരിക്കുന്ന 'തേരേ ഇഷ്ക് മേ' എന്ന സിനിമയുടെ ചിത്രീകരണത്തിന് ശേഷം, യുകെയില്‍ വെക്കേഷന്‍ ആസ്വദിക്കുന്ന ഒട്ടേറെ ചിത്രങ്ങളും വിഡിയോകളും കൃതി ഇന്‍സ്റ്റഗ്രാമില്‍ പങ്കിട്ടു. 

ആൽബത്തിലെ ആദ്യ ഫോട്ടോയിൽ ഒരു പൂന്തോട്ടത്തിൽ പോസ് ചെയ്യുന്ന കൃതിയെ കാണാം. തുടർന്ന് ഇളം നീല നിറത്തിലുള്ള കാർഡിഗനും ക്ലാസിക് നീല ഡെനിം ജീൻസും ധരിച്ച നടിയുടെ ചില മനോഹരമായ സെൽഫികൾ ഉണ്ട്. തുടർന്ന്, രുചികരമായ ഭക്ഷണത്തിന്റെയും ബോൺഫയറിന്‍റെയും കാഴ്ചയാണ്. ശേഷം ഒരു കാറിൽ ഒരു സെൽഫിക്ക് പോസ് ചെയ്യുന്നതും കാണാം. യുകെയില്‍ വെക്കേഷന്‍ കാലം ചെലവിടാന്‍ ആഗ്രഹിക്കുന്ന ആളുകള്‍ക്ക് മികച്ച സമയമാണ് ഏപ്രില്‍ മേയ് മാസങ്ങള്‍. ഇവിടം സന്ദർശിക്കാൻ ഏറ്റവും അനുയോജ്യമായ സമയം വസന്തകാലവും (മാർച്ച് അവസാനം മുതൽ ജൂൺ ആദ്യം വരെ) ശരത്കാലവുമാണ് (സെപ്റ്റംബർ മുതൽ നവംബർ വരെ). വസന്തകാലം വളരെ തിരക്കേറിയ ടൂറിസ്റ്റ് സീസണാണ്. യുകെയിലെ ഒട്ടനേകം വരുന്ന പൂന്തോട്ടങ്ങളില്‍ ഏപ്രിൽ, മേയ് മാസങ്ങളിൽ, ടുലിപ്സ്, നാർസിസസ്, ലുപിൻസ്, ബ്ലൂബെൽ, ഡാഫോഡിൽസ് പുഷ്പങ്ങള്‍ നിറയും. ഹോളണ്ട് പാർക്കിലെ ക്യോട്ടോ ഗാർഡൻ പോലുള്ള ലണ്ടനിലെ രഹസ്യ ഉദ്യാനങ്ങൾ അവയുടെ ഏറ്റവും മികച്ച അവസ്ഥയിലായിരിക്കുന്ന സമയം കൂടിയാണിത്.

മേയ്, ജൂൺ മാസങ്ങളിൽ യുണൈറ്റഡ് കിങ്ഡത്തിലുടനീളം നിരവധി പരിപാടികളും ഉത്സവങ്ങളും നടക്കുന്നുണ്ട്. ഏറ്റവും പ്രശസ്തമായവ ഔട്ട്ഡോർ ടെന്നീസ് ടൂർണമെന്റ് വിംബിൾഡൺ, റോയൽ അസ്കോട്ട് കുതിരപ്പന്തയ മത്സരം, ഗ്ലാസ്റ്റൺബറി ഫെസ്റ്റിവൽ, തേംസിലെ മനോഹരമായ ഹെൻലി ഓൺ തേംസിൽ നടക്കുന്ന ബോട്ട് റേസുകളുടെ ഒരു പരമ്പരയായ റോയൽ റെഗറ്റ എന്നിവയാണ്.ലണ്ടനിലെ ചെൽസി പുഷ്പമേള നടക്കുന്നത് മേയ് മാസത്തിലാണ്. കൂടാതെ ക്യൂ ഗാർഡൻസ് , റീജന്റ്സ് പാർക്ക് , ഗ്രീൻവിച്ച് പാർക്ക് പോലുള്ള ഇടങ്ങില്‍ ചെറി ബ്ലോസം കാഴ്ച ആസ്വദിക്കാം. വസന്തകാലത്ത് സൂര്യപ്രകാശം നിറഞ്ഞ ആകാശത്തിനു കീഴിൽ, ഗാംഭീര്യത്തോടെ ഉയര്‍ന്നു നില്‍ക്കുന്ന ബക്കിങ്‌ഹാം കൊട്ടാരം കാണേണ്ട കാഴ്ചയാണ്. ചരിത്രം പ്രകൃതിയെ കണ്ടുമുട്ടുന്ന സ്കോട്ട്ലൻഡും ഈ സമയത്ത് സന്ദര്‍ശിക്കാന്‍ മികച്ച സമയമാണ്. എഡിൻബർഗ് കൊട്ടാരം കാണാം. ആര്‍തേഴ്സ് സീറ്റില്‍ പോയിരുന്നു സ്വർണ സായാഹ്ന വെളിച്ചത്തിൽ കുളിച്ചുനിൽക്കുന്ന നഗരത്തിന്‍റെ അതിശയിപ്പിക്കുന്ന കാഴ്ച കാണാം. വേനൽക്കാലത്തിന്‍റെ ആരംഭം ആഘോഷിക്കുന്ന ഒരു ആധുനിക സെൽറ്റിക് ഉത്​സവമായ ബെൽറ്റെയ്ൻ ഫയർ ഫെസ്റ്റിവൽ ഏപ്രില്‍ അവസാനദിനമാണ് നടക്കുന്നത്.