ഗുജറാത്തിനെതിരെ തോറ്റ രാജസ്ഥാന് തിരിച്ചടി; സ്ലോ ഓവർ റേറ്റിന് ക്യാപ്റ്റൻ സഞ്ജുവിന് 24 ലക്ഷം രൂപ പിഴ

അഹമ്മദാബാദ്: ഐപിഎൽ 2025 ലെ മൂന്നാം മത്സരത്തിൽ ഗുജറാത്ത് ടൈറ്റൻസിനെതിരെ 200 ലധികം റൺസ് വിജയലക്ഷ്യം പിന്തുടരുന്നതിൽ പരാജയപ്പെട്ട രാജസ്ഥാൻ റോയൽസിന് വീണ്ടും തിരിച്ചടി. മത്സരത്തിൽ സ്ലോ ഓവർ റേറ്റ് നിലനിർത്തിയതിന് ടീം ക്യാപ്റ്റൻ സഞ്ജു സാംസണിന് ബിസിസിഐ 24 ലക്ഷം രൂപ പിഴ ചുമത്തി.

ഈ സീസണിൽ സ്ലോ ഓവർ റേറ്റിന് രാജസ്ഥാൻ റോയൽസ് കുറ്റക്കാരാണെന്ന് കണ്ടെത്തുന്ന ഇത് രണ്ടാം തവണയാണ്. ഐപിഎല്ലിൻ്റെ പെരുമാറ്റച്ചട്ടത്തിലെ ആർട്ടിക്കിൾ 2.22 പ്രകാരം ടീമിൻ്റെ സീസണിലെ രണ്ടാമത്തെ പിഴവായതിനാൽ സഞ്ജു സാംസണിന് 24 ലക്ഷം രൂപ പിഴ ചുമത്തിയതായി ഐപിഎൽ അധികൃതർ അറിയിച്ചു.

കൂടാതെ, ഇംപാക്റ്റ് പ്ലെയർ ഉൾപ്പെടെയുള്ള പ്ലേയിംഗ് ഇലവനിലെ മറ്റ് അംഗങ്ങൾക്ക് ആറ് ലക്ഷം രൂപ വീതമോ അല്ലെങ്കിൽ അവരുടെ മാച്ച് ഫീസിൻ്റെ 25 ശതമാനമോ, ഏതാണോ കുറവ് അത് പിഴയായി ഈടാക്കും. നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ ഗുജറാത്ത് ടൈറ്റൻസിൻ്റെ ഇന്നിംഗ്‌സിൻ്റെ അവസാന ഓവറിനിടെ ഫീൽഡിംഗ് നിയന്ത്രണം ലംഘിച്ചതിനും രാജസ്ഥാൻ റോയൽസിന് പിഴ ചുമത്തിയിരുന്നു.

സന്ദീപ് ശർമ്മ എറിഞ്ഞ 20-ാം ഓവറിൽ സർക്കിളിന് പുറത്ത് അനുവദനീയമായതിലും കൂടുതൽ ഫീൽഡർമാരെ നിയോഗിച്ചതാണ് ഇതിന് കാരണം. ഈ ഓവറിൽ ഗുജറാത്ത് 16 റൺസ് നേടി 217/6 എന്ന മികച്ച സ്കോറിൽ എത്തുകയും ചെയ്തു. 218 റൺസ് വിജയലക്ഷ്യവുമായി ഇറങ്ങിയ രാജസ്ഥാൻ റോയൽസിന് തുടർച്ചയായി വിക്കറ്റുകൾ നഷ്ടമായി.

സഞ്ജു സാംസണും ഷിംറോൺ ഹെറ്റ്‌മയറും ക്രീസിൽ ഒന്നിച്ചതിന് ശേഷമാണ് അവർക്ക് മത്സരത്തിൽ നേരിയ പ്രതീക്ഷയുണ്ടായത്. എട്ടാം ഓവറിൽ ധ്രുവ് ജുറൽ പുറത്തായ ശേഷം ഇരുവരും ചേർന്ന് 48 റൺസിൻ്റെ കൂട്ടുകെട്ടുണ്ടാക്കി ടീമിനെ 68/4 എന്ന നിലയിൽ നിന്ന് 116/4 ലേക്ക് എത്തിച്ചു.

എന്നാൽ, സാംസൺ 41 റൺസിന് പുറത്തായതോടെ ഗുജറാത്ത് ടൈറ്റൻസ് കളിയിൽ പിടിമുറുക്കി. ഒടുവിൽ രാജസ്ഥാൻ റോയൽസ് 19.2 ഓവറിൽ 159 റൺസിന് എല്ലാവരും പുറത്തായി 58 റൺസിന് പരാജയപ്പെട്ടു. ഈ വിജയത്തോടെ ഗുജറാത്ത് ടൈറ്റൻസ് അഞ്ച് മത്സരങ്ങളിൽ നിന്ന് എട്ട് പോയിന്റുമായി പോയിന്റ് പട്ടികയിൽ ഒന്നാം സ്ഥാനത്തെത്തി. അതേസമയം, രാജസ്ഥാൻ റോയൽസ് പോയിന്റ് പട്ടികയിൽ ഏഴാം സ്ഥാനത്തേക്ക് പിന്തള്ളപ്പെട്ടു.