ഇന്നലെ മാനത്തുദിച്ച മൈക്രോ മൂൺ (കൊച്ചമ്പിളി) അപൂർവ പ്രതിഭാസമല്ല. എന്നാൽ വിഷുവും ചിത്രാ പൗർണ്ണമിയും ഒത്തു വന്നപ്പോൾ കാര്യം വൈറലായി.

പത്തനംതിട്ട∙ ഇന്നലെ മാനത്ത് ഉദിച്ച ചന്ദ്രൻ ഈ വർഷത്തെ ഏറ്റവും ചെറിയ പൗർണ്ണമി ചന്ദ്രനായിരുന്നു. സാങ്കേതികമായി മൈക്രോമൂൺ (കൊച്ചമ്പിളി) എന്നറിയപ്പെടുന്ന ഈ പ്രതിഭാസം ചന്ദ്രൻ ഭൂമിയിൽനിന്ന് ഏറ്റവും അകലെ ആയിരിക്കുമ്പോൾ സംഭവിക്കുന്നതാണ്.

അതുകൊണ്ടു തന്നെ ഈ ചന്ദ്രൻ വലുപ്പവും പ്രകാശവും കുറഞ്ഞാണ് കാണപ്പെടുകയെന്ന് അമച്വർ വാനനിരീക്ഷകനായ സുരേന്ദ്രൻ പുന്നശേരി പറഞ്ഞു.എന്നാൽ സാധാരണ കാഴ്ചയിൽ ഈ വ്യത്യാസം തിരിച്ചറിയില്ല. ‘മൈക്രോ മൂൺ’ അപൂർവ പ്രതിഭാസമല്ല.

എന്നാൽ വിഷുവും ചിത്രാ പൗർണ്ണമിയും ഒത്തു വന്നപ്പോൾ കാര്യം വൈറലായി എന്നേയുള്ളു. പാശ്ചാത്യർ ‘പിങ്ക് മൂൺ’ എന്നു വിളിക്കുന്നതും ഈ പൗർണ്ണമിയെതന്നെ. വെളിച്ചത്തിന്റെ തീവ്രത അൽപം കുറഞ്ഞതിനാൽ അസ്ട്രോ ഫൊട്ടോഗ്രഫർമാർക്ക് ഇതൊരു സുവർണ്ണാവസരമായിരുന്നു.