പഹൽഗാം ഭീകരാക്രമണം: പോണി റൈഡ് ഓപ്പറേറ്റർ സയ്യിദ് വിനോദ സഞ്ചാരികളെ രക്ഷപ്പെടുത്തിനിടക്ക് കൊല്ലപ്പെട്ടു

പഹൽഗാമിൽ നടന്ന ഭീകരാക്രമണത്തിൽ കൊല്ലപ്പെട്ടവരിൽ ഒരാളായ സയ്യിദ് ആദിൽ ഹുസൈൻ ഷാ ഒരു പോണി റൈഡ് ഓപ്പറേറ്ററായിരുന്നു. തീവ്രവാദികളുമായി ഏറ്റുമുട്ടുന്നതിനിടെ വെടിയേറ്റാണ് അദ്ദേഹം മരിച്ചത്.

മാധ്യമ റിപ്പോർട്ടുകൾ പ്രകാരം, ഒരു പ്രദേശവാസിയായ ആദിൽ ആക്രമണത്തിനിടെ ഒരു സ്ത്രീയെ രക്ഷിക്കാൻ ശ്രമിച്ചു. കൂടാതെ ഭീകരരിൽ നിന്ന് തോക്ക് തട്ടിയെടുക്കാനും ശ്രമം നടത്തി.കുടുംബത്തിലെ ഏക വരുമാന സ്രോതസ്സായിരുന്നു ആദിൽ. ആക്രമണത്തിൽ കൊല്ലപ്പെട്ടവരിൽ മുസ്ലീം സമുദായത്തിൽ നിന്നുള്ള ഏക വ്യക്തിയും അദ്ദേഹമായിരുന്നു.വിനോദസഞ്ചാരികളുടെ മതം ചോദിച്ചറിഞ്ഞ ശേഷം, അവരോട് കൽമ ചൊല്ലാൻ ആവശ്യപ്പെട്ടതിന് ശേഷമാണ് തീവ്രവാദികൾ വെടിയുതിർത്തതെന്ന് റിപ്പോർട്ടുകൾ സൂചിപ്പിക്കുന്നു.

"എൻ്റെ മകൻ പഹൽഗാമിൽ ജോലിക്ക് പോയതായിരുന്നു. ഉച്ചകഴിഞ്ഞ് 3 മണിയോടെയാണ് ആക്രമണത്തെക്കുറിച്ച് ഞങ്ങൾ അറിയുന്നത്. ഞങ്ങൾ അവനെ വിളിച്ചെങ്കിലും ഫോൺ സ്വിച്ച് ഓഫ് ആയിരുന്നു," ഷായുടെ പിതാവ് വാർത്താ ഏജൻസിയായ എഎൻഐയോട് പറഞ്ഞു."പിന്നീട്, വൈകുന്നേരം 4.40 ന് അവൻ്റെ ഫോൺ ഓണായി, പക്ഷേ ആരും ഫോൺ എടുത്തില്ല. ഞങ്ങൾ പോലീസ് സ്റ്റേഷനിലേക്ക് പോയപ്പോഴാണ് ആക്രമണത്തിൽ അവന് പരിക്കേറ്റതായി അറിയുന്നത്. ഇതിന് ഉത്തരവാദികളായവർ അതിന്റെ അനന്തരഫലങ്ങൾ അനുഭവിക്കേണ്ടിവരും." ഷാ പിന്നീട് മരിച്ചു.

അവനെ ഓർത്ത് വേദനിക്കുന്ന അവൻ്റെ അമ്മ പറഞ്ഞു, "കുടുംബത്തിൻ്റെ ഏക ആശ്രയം അവനായിരുന്നു..." ആക്രമണത്തിൽ ആകെ 26 വിനോദസഞ്ചാരികൾ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു.