ജർമ്മനിയിൽ കുടിയേറ്റ ആരോഗ്യ പ്രവർത്തകരെ പിന്തുണച്ച് സോഷ്യൽ മീഡിയ ക്യാമ്പയിൻ

ജർമ്മനി; തീവ്ര വലതുപക്ഷ പാർട്ടിയായ എ.എഫ്.ഡി (AfD) യുടെ വളർച്ചയ്‌ക്കെതിരെ ആരോഗ്യ രംഗത്തെ ജീവനക്കാർ സോഷ്യൽ മീഡിയയിൽ ശക്തമായ പ്രതിരോധം തീർക്കുന്നു. കുടിയേറ്റക്കാരായ സഹപ്രവർത്തകരുടെ പ്രാധാന്യം വിളിച്ചോതുന്ന #pflegeistebunt (പരിചരണം വർണ്ണാഭമാണ്) എന്ന ഹാഷ്‌ടാഗ് ടിക് ടോക്കിലും ഇൻസ്റ്റാഗ്രാമിലും തരംഗമാവുകയാണ്.

ഫെബ്രുവരി 23-ന് നടന്ന നിയമസഭാ തിരഞ്ഞെടുപ്പിൽ എ.എഫ്.ഡി ചരിത്രപരമായ വിജയം നേടിയിരുന്നു. 21% വോട്ടുകൾ നേടി രാജ്യത്തെ രണ്ടാമത്തെ വലിയ രാഷ്ട്രീയ ശക്തിയായി അവർ മാറി. കടുത്ത കുടിയേറ്റ വിരുദ്ധ നിലപാടുകളുള്ള ഈ പാർട്ടിയുടെ വളർച്ച, ആരോഗ്യ രംഗത്ത് ആശങ്കകൾ സൃഷ്ടിച്ചിട്ടുണ്ട്. വിദേശ തൊഴിലാളികളുടെ അഭാവം ആരോഗ്യ സേവനങ്ങളെ എങ്ങനെ ബാധിക്കുമെന്ന് കാണിക്കുന്ന വീഡിയോകളാണ് ഇപ്പോൾ സോഷ്യൽ മീഡിയയിൽ പ്രചരിക്കുന്നത്.

കഴിഞ്ഞ മാർച്ചിലാണ് #pflegeistebunt എന്ന ഹാഷ്‌ടാഗ് ആദ്യമായി പ്രചരിച്ചത്. കുടിയേറ്റക്കാരായ ജീവനക്കാർ ഓരോരുത്തരായി ഫ്രെയിമിൽ നിന്ന് മാറി നിൽക്കുന്ന വീഡിയോകളിലൂടെ, അവരുടെ അഭാവം ആശുപത്രികളെ എങ്ങനെ ബാധിക്കുമെന്ന് ആരോഗ്യ പ്രവർത്തകർ വ്യക്തമാക്കുന്നു. "കുടിയേറ്റം ഇല്ലായിരുന്നെങ്കിൽ നമ്മുടെ ആശുപത്രി എങ്ങനെയിരിക്കുമായിരുന്നു?" എന്ന ചോദ്യം ഈ വീഡിയോകൾ ഉയർത്തുന്നു. ഇത് ഒരു ട്രെൻഡായി മാറിയതോടെ, രാജ്യത്തെ വിവിധ ആശുപത്രികൾ കുടിയേറ്റക്കാരുടെ പ്രാധാന്യം വിളിച്ചോതുന്ന വീഡിയോകളുമായി രംഗത്തെത്തി.

ജർമ്മനിയിൽ, പ്രത്യേകിച്ച് ആരോഗ്യ രംഗത്ത്, കടുത്ത തൊഴിലാളി ക്ഷാമം നിലനിൽക്കുന്നുണ്ട്. എ.എഫ്.ഡി അതിർത്തികൾ അടയ്ക്കാൻ ആഗ്രഹിക്കുമ്പോൾ, യാഥാസ്ഥിതിക പാർട്ടിയായ സി.ഡി.യു/സി.എസ്.യു (CDU/CSU) നേതാക്കൾ സിറിയൻ അഭയാർത്ഥികൾക്ക് മടക്ക ടിക്കറ്റും 1,000 യൂറോ ബോണസും വാഗ്ദാനം ചെയ്യുന്നു. നിയമസഭാ തിരഞ്ഞെടുപ്പിൽ വിജയം നേടിയ യാഥാസ്ഥിതിക നേതാവ് ഫ്രെഡറിക് മെർസ്, അനധികൃത കുടിയേറ്റത്തിനെതിരെ ശക്തമായ നിലപാടാണ് സ്വീകരിക്കുന്നത്.

ഈ സാഹചര്യത്തിൽ, കുടിയേറ്റക്കാരായ ആരോഗ്യ പ്രവർത്തകരുടെ സേവനം എത്രത്തോളം അനിവാര്യമാണെന്ന് വ്യക്തമാക്കുന്ന സോഷ്യൽ മീഡിയ ക്യാമ്പയിൻ ശ്രദ്ധേയമാവുകയാണ്.