ഗുരുവായൂർ ഉത്സവംകൊടിയേറുന്നു : പൈതൃകത്തിൻ്റെ പത്ത് ദിനങ്ങൾ

 ഗുരുവായൂർ ക്ഷേത്രത്തിലെ വാർഷികോത്സവത്തിന് ഇന്ന് (മാർച്ച് 10) കൊടിയേറും. കുംഭമാസത്തിലെ പൂയം നക്ഷത്രത്തിൽ ആരംഭിക്കുന്ന പത്തുദിവസത്തെ ഈ ഉത്സവം മാർച്ച് 19-ന് ആറാട്ടോടുകൂടി സമാപിക്കും.

കലശം: ഉത്സവത്തിന് മുന്നോടിയായുള്ള ശുദ്ധിക്രിയകൾ

ഉത്സവത്തിന് എട്ടുദിവസം മുൻപ് കലശം ആരംഭിക്കും. കഴിഞ്ഞ ഒരു വർഷം ക്ഷേത്രത്തിനകത്തുണ്ടായ അശുദ്ധികൾക്ക് പ്രായശ്ചിത്തം ചെയ്യുന്ന ചടങ്ങാണ് കലശം. കലശത്തിലെ ആദ്യദിവസം ആചാര്യവരണമാണ്. ക്ഷേത്രാചാര്യൻ തന്ത്രിയാണെങ്കിലും കലശത്തിനായി പ്രത്യേക ആചാര്യനുണ്ടാകും. ആചാര്യന് പവിത്രവും മറ്റും നൽകി വരിക്കുന്ന ചടങ്ങാണ് ആചാര്യവരണം. തുടർന്ന് ബിംബശുദ്ധി, പ്രസാദശുദ്ധി എന്നിവ നടക്കും. വിഗ്രഹത്തിന് ശുദ്ധി വരുത്തുന്ന ചടങ്ങാണ് ബിംബശുദ്ധി. ശ്രീകോവിലിന് ശുദ്ധി വരുത്തുന്ന ചടങ്ങാണ് പ്രസാദശുദ്ധി. പിന്നീട് അഞ്ച് പ്രായശ്ചിത്ത ഹോമങ്ങൾ നടക്കും. തുടർന്ന് ശാന്തി, അത്ഭുതശാന്തി മുതലായ പ്രായശ്ചിത്തങ്ങളും മൂർത്തിയിൽ ക്ഷയിച്ച ദേവചൈതന്യത്തെ ഉത്തേജിപ്പിക്കാനുള്ള തത്ത്വകലശവും നടക്കും. അതിനുശേഷം സഹസ്രകലശം. ഇത്തരത്തിൽ വർധിതമായ ദേവചൈതന്യത്തെ ജനങ്ങളിലേക്ക് എത്തിക്കുന്നതാണ് ഉത്സവം.

ആനയോട്ടം: ഐതിഹ്യത്തിൻ്റെ പുനരാവിഷ്കാരം

ആനയോട്ടം ചടങ്ങുകളോടെയാണ് ഗുരുവായൂർ ഉത്സവം ആരംഭിക്കുന്നത്. ആനയില്ലാത്ത ഒരു കാലം ഗുരുവായൂർ ക്ഷേത്രത്തിനുണ്ടായിരുന്നുവെന്നും തൃക്കണമതിലകത്തുനിന്ന് ആന ഗുരുവായൂരിലേക്ക് ഓടിവന്നുവെന്നും വിശ്വാസമുണ്ട്. അതിനെ ഓർമിപ്പിക്കുന്ന ചടങ്ങാണ് ആനയോട്ടം.

ഉത്സവത്തിലെ പ്രധാന ചടങ്ങുകൾ

കൊടിയേറ്റം: ഉത്സവത്തിൻ്റെ ആരംഭംകുറിച്ച് ക്ഷേത്രത്തിലെ കൊടിമരത്തിൽ കൊടിയേറ്റുന്നു. 

ആനയോട്ടം : ഉത്സവത്തിലെ പ്രധാന ആകർഷണങ്ങളിലൊന്നാണ് ആനയോട്ടം. മാർച്ച് 10-ന് ഉച്ചയ്ക്ക് 3-ന് നടക്കുന്ന ആനയോട്ടത്തിൽ പങ്കെടുക്കുന്ന 10 ആനകളിൽ 3 എണ്ണമാണ് ഓടുന്നത്.

ശ്രീഭൂതബലി: ദിവസവും രാവിലെയും രാത്രിയിലുമായി ശ്രീഭൂതബലി നടക്കുന്നു.

വിളക്കെഴുന്നള്ളിപ്പ്: രാത്രിയിൽ വിളക്കെഴുന്നള്ളിപ്പ് നടക്കുന്നു. രണ്ടാം ദിവസം ദിക്ക് കൊടികൾ സ്ഥാപിക്കുന്നു. രണ്ടാം വിളക്ക് മുതൽ ഏഴാം വിളക്ക് വരെ ഇതേ ചടങ്ങുകൾ തന്നെയാണുള്ളത്.

ഉത്സവബലി: എട്ടാം ദിവസമാണ് ഉത്സവബലി നടക്കുന്നത്.

പള്ളിവേട്ട: ഒമ്പതാം ദിവസമാണ് പള്ളിവേട്ട നടക്കുന്നത്. പള്ളിവേട്ട ദിനത്തിൽ പക്ഷിമൃഗാദികളുടെ വേഷംകെട്ടുന്നവർക്കൊപ്പം 5 പേരെ മാത്രമേ ഓടാൻ അനുവദിക്കുകയുള്ളൂ. 3 പ്രദക്ഷിണം കഴിഞ്ഞാൽ വലിയ വേഷങ്ങൾ പുറത്തേക്ക് വിടും.പത്താം ദിവസമാണ് ആറാട്ട് നടക്കുന്നത്.

ഉത്സവത്തിൻ്റെ പ്രത്യേകതകൾ

ഗുരുവായൂർ ക്ഷേത്രത്തിലെ ഉത്സവങ്ങളിൽ ആനകൾക്ക് വലിയ പ്രാധാന്യമുണ്ട്. പഞ്ചവാദ്യം, പാണ്ടിമേളം തുടങ്ങിയ വാദ്യങ്ങളുടെ അകമ്പടിയോടെയാണ് ഉത്സവച്ചടങ്ങുകൾ നടക്കുന്നത്.ഗുരുവായൂർ ഉത്സവം ദർശിക്കുന്നത് പുണ്യകരമായി ഭക്തർ കരുതുന്നു.ഉത്സവം പള്ളിവേട്ട, ആറാട്ട് ദിവസങ്ങളിൽ ഇക്കുറി ചമയപ്രദർശനമുണ്ട്. ശ്രീവത്സം അനക്സ് മന്ദിരത്തിലെ കൃഷ്ണഗീതി ഹാളിൽ രാവിലെ 10 മുതൽ 5 വരെയാണ് ചമയപ്രദർശനം.

മറ്റു വിവരങ്ങൾ

ഉത്സവത്തിന് മുന്നോടിയായി ക്ഷേത്രത്തിലെ സഹസ്രകലശച്ചടങ്ങുകൾ നടന്നു . മാർച്ച് 9-നാണ് ബ്രഹ്‌മകലശാഭിഷേകം. . ഗുരുവായൂർ ഉത്സവം ഭക്തർക്ക് ആത്മീയ ഉണർവ് നൽകുന്ന ഒരു പ്രധാന ആഘോഷമാണ്. ഗുരുവായൂർ ക്ഷേത്രത്തിലെ ഉത്സവാഘോഷത്തിന് 4.55 കോടി രൂപയുടെ എസ്റ്റിമേറ്റ് ദേവസ്വം ഭരണസമിതി അംഗീകരിച്ചു. ഇതിൽ 3.34 കോടി രൂപ ഉത്സവത്തിൻ്റെ വിശേഷവിഭവങ്ങളായ കഞ്ഞി, പുഴുക്ക്, സദ്യ, ക്ഷേത്രവുമായി ബന്ധപ്പെട്ടവർക്കുള്ള ഉത്സവ പകർച്ച എന്നിവയ്ക്കാണ്. ക്ഷേത്രച്ചടങ്ങുകൾക്ക് 35.10 ലക്ഷം, കലാപരിപാടികൾക്ക് 42 ലക്ഷം, വൈദ്യുതാലങ്കാരത്തിന് 19 ലക്ഷം, വാദ്യത്തിന് 25 ലക്ഷം രൂപ വീതം വകയിരുത്തി. 10-ന് രാത്രി 8.30-ന് ശേഷം കൊടിയേറ്റം.

ഭരണസമിതി യോഗത്തിൽ ചെയർമാൻ ഡോ. വി.കെ. വിജയൻ, ഭരണസമിതി അംഗങ്ങളായ മല്ലിശ്ശേരി പരമേശ്വരൻ നമ്പൂതിരിപ്പാട്, തന്ത്രി ചേന്നാസ് ദിനേശൻ നമ്പൂതിരിപ്പാട്, സി. മനോജ്, കെ.പി. വിശ്വനാഥൻ, അഡ്മിനിസ്ട്രേറ്റർ കെ.പി. വിനയൻ എന്നിവർ പങ്കെടുത്തു.

ദർശന നിയന്ത്രണം

ഗുരുവായൂർ ക്ഷേത്രത്തിൽ സഹസ്രകലശച്ചടങ്ങുകൾ നടക്കുന്നതിനാൽ ഇന്ന് പുലർച്ചെ 4.15 മുതൽ ഉച്ചവരെയും നാളെ പുലർച്ചെ 4.15 മുതൽ 11 വരെയും ദർശന നിയന്ത്രണമുണ്ടാകും. 10-ന് ഉച്ചയ്ക്ക് 1-ന് നട അടയ്ക്കും. സന്ധ്യയ്ക്ക് ദീപാരാധന കഴിഞ്ഞ് അരമണിക്കൂർ ദർശനമുണ്ടാകില്ല.