.പരീക്ഷാ വിജയത്തിനൊപ്പം നന്മയുടെ കൈത്താങ്ങ്:,എടപ്പാൾ പോട്ടൂർ മോഡേൺ സ്കൂൾ വിദ്യാർത്ഥികൾ മാതൃകയായി.

എടപ്പാൾ: പരീക്ഷാ വിജയത്തിനൊപ്പം സാമൂഹിക പ്രതിബദ്ധതയുടെ ഉദാത്ത മാതൃക തീർത്ത് എടപ്പാൾ പോട്ടൂർ മോഡേൺ ഹയർസെക്കൻഡറി സ്കൂൾ വിദ്യാർത്ഥികൾ. പരീക്ഷ പൂർത്തിയാക്കി വിദ്യാലയത്തിൽ നിന്ന് പടിയിറങ്ങിയ പത്താം ക്ലാസ്, പന്ത്രണ്ടാം ക്ലാസ് വിദ്യാർത്ഥികൾ, സ്കൂൾ പരിസരത്തെ 25 ഓളം നിർധന കുടുംബങ്ങൾക്ക് പലചരക്ക് കിറ്റുകൾ വിതരണം ചെയ്താണ് സ്നേഹത്തിൻ്റെയും കരുതലിൻ്റെയും പാഠം പകർന്ന് നൽകിയത്.

പ്രിൻസിപ്പൽ എ.വി. സുഭാഷ് പരിപാടി ഉദ്ഘാടനം ചെയ്തു. വൈസ് പ്രിൻസിപ്പൽ അബ്ദുൾ അസീസ്, മാനേജ്മെൻ്റ് പ്രതിനിധികളായ എൻ. മൊയ്തുണ്ണി, ഹസ്സൻ മൗലവി, അധ്യാപകർ എന്നിവരുടെ നേതൃത്വത്തിലാണ് പരിപാടി സംഘടിപ്പിച്ചത്. വിദ്യാർത്ഥികളുടെ ഈ കൂട്ടായ്മ, ഇന്നത്തെ തലമുറ മാനുഷിക മൂല്യങ്ങൾ കൈവിട്ടിട്ടില്ലെന്നതിൻ്റെ ഉത്തമ ഉദാഹരണമാണെന്ന് പ്രിൻസിപ്പൽ എ.വി. സുഭാഷ് അഭിപ്രായപ്പെട്ടു.

ഇത്തരം പ്രവർത്തനങ്ങൾ വരുംതലമുറയ്ക്ക് പ്രചോദനമാകട്ടെയെന്ന് സെക്രട്ടറി ഹസ്സൻ മൗലവി ആശംസിച്ചു. വിദ്യാർത്ഥികളിൽ സഹാനുഭൂതിയും ദയയും വളർത്താൻ ഇത്തരം പ്രവർത്തനങ്ങൾ സഹായിക്കുമെന്ന് സ്കൂൾ മാനേജർ എൻ. മൊയ്തുണ്ണി അഭിപ്രായപ്പെട്ടു. സിലബസിനപ്പുറം ജീവിത പാഠങ്ങൾ കൂടി ഉൾക്കൊണ്ടാണ് വിദ്യാർത്ഥികൾ പടിയിറങ്ങുന്നതെന്ന സന്തോഷത്തിലാണ് വിദ്യാലയം.