മോഷ്ടിച്ച ബൈക്കുകളുമായി 5 സ്കൂൾ കുട്ടികൾ പിടിയിൽ;

കോഴിക്കോട് : മോഷ്ടിച്ച ബൈക്കുകളുമായി സ്കൂൾ കുട്ടികൾ പൊലീസ് പിടിയിൽ. 6 ബൈക്കുകളുമായി 5 വിദ്യാർഥികളാണ് പിടിയിലായത്.

9, 10 ക്ലാസുകളിൽ പഠിക്കുന്ന കുട്ടികളാണ് പിടിയിലായിരിക്കുന്നത്. വടകര റെയിൽവേ സ്റ്റേഷൻ പരിസരത്തു നിന്നാണ് ഇവർ വാഹനങ്ങൾ മോഷ്ടിച്ചത്.

ബൈക്കുകളുടെ ലോക് സെറ്റ് തകർത്താണ് വാഹനങ്ങൾ മോഷ്ടിക്കാറുള്ളതെന്ന് ഇവർ പൊലീസിന് മൊഴി നൽകി. രാത്രികാലങ്ങളിൽ വീട്ടുകാർ ഉറങ്ങിയ ശേഷം പുറത്തുകടന്ന് പുലരുന്നതിന് മുൻപ് തിരികെ എത്തുന്നതാണ് ഇവരുടെ രീതി.

അതിനാൽ തന്നെ വീട്ടുകാർക്കും മോഷണവുമായി ബന്ധപ്പെട്ട വിവരങ്ങൾ അറിവില്ലായിരുന്നു. മോഷ്ടിച്ച ബൈക്കുകളുടെ നിറം മാറ്റിയിട്ടുണ്ട്.

ഇവർ കൂടുതൽ മോഷണം നടത്തിയിട്ടുണ്ടോയെന്ന് പൊലീസ് അന്വേഷിക്കും.