സംസ്ഥാനത്ത് തുടർഭരണം നേടിയെടുക്കാൻ ജനങ്ങൾ പറയുന്നത് കേൾക്കണം; എം.എ. ബേബി

കൊല്ലം: സംസ്ഥാനത്ത് തുടർഭരണം നേടിയെടുക്കാൻ ജനങ്ങൾ പറയുന്നത് കേൾക്കണമെന്ന് പി.ബി. അം​ഗം എം.എ. ബേബി. അത്തരത്തിലുള്ള ചർച്ചകൾ സി.പി.എം. സമ്മേളനത്തിലുണ്ടാകുമെന്നും എം.എ. ബേബി പറഞ്ഞു. സമ്മേളനത്തിന്റെ ഭാ​ഗമായുള്ള കൊടിമര ജാഥ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

'2025 മാര്‍ച്ചില്‍ സംസ്ഥാന സമ്മേളനം ഇവിടെ നടന്ന് ഒരു വര്‍ഷം കഴിയുമ്പോള്‍ നിയമസഭാ തിരഞ്ഞെടുപ്പാണ്. 1995-ലെ സംസ്ഥാന സമ്മേളനം കൊല്ലത്ത് കഴിഞ്ഞ് 96-ൽ ഇടതുപക്ഷജനാധിപത്യ പ്രസ്ഥാനത്തിന് ജയിക്കാന്‍ കഴിഞ്ഞിരുന്നു. 

എന്നാൽ, 96-ലെ പോലെ അല്ല 2026. ഇപ്പോൾ തുടർഭരണം നടക്കുമ്പോഴാണ് ഇവിടെ സംസ്ഥാന സമ്മേളനം നടക്കുന്നത്. ആ തുടർഭരണത്തിന് വീണ്ടുമൊരു തുടർച്ച നേടിയൊടുക്കാൻ കഴിയുന്ന ചർച്ചകളും തീരുമാനങ്ങളും സംസ്ഥാന സമ്മേളനത്തിൽ നടക്കുമോ എന്നാണ് നമ്മൾ ഉറ്റുനോക്കുന്നത്', എം.എ. ബേബി പറഞ്ഞു.

സി.പി.എം. 24-ാം പാർട്ടി കോൺഗ്രസിന് മുന്നോടിയായുള്ള സംസ്ഥാന സമ്മേളനം വ്യാഴാഴ്ചയാണ് ആരംഭിക്കുന്നത്. 30 വർഷങ്ങൾക്കുശേഷമാണ് കൊല്ലത്ത് സംസ്ഥാന സമ്മേളനം നടക്കുന്നത്.

വ്യാഴാഴ്ച മുതൽ ഒമ്പത് വരെ സി. കേശവൻ മെമ്മോറിയൽ ടൗൺ ഹാളിലെ കോടിയേരി ബാലകൃഷ്ണൻ നഗറിലാണ് പ്രതിനിധി സമ്മേളനം.