വാട്ടര്‍ ടാങ്കില്‍ വെള്ളമുണ്ടോയെന്ന് നോക്കാൻ കയറി, രാത്രി കാല്‍ വഴുതി താഴെ വീണ് ഗൃഹനാഥന് ദാരുണാന്ത്യം,

തിരുവനന്തപുരം: വാട്ടർ ടാങ്കില്‍ വെള്ളമുണ്ടോയെന്ന് നോക്കാൻ ടെറസില്‍ കയറിയ ഗൃഹനാഥന് കാല്‍തെറ്റിവീണ് ദാരുണാന്ത്യം.

വെള്ളനാടിന് സമീപം കുളക്കോട്ട് സ്വദേശി രാജേന്ദ്രൻ നായർ (56) ആണ് മരിച്ചത്. കഴിഞ്ഞ ദിവസം രാത്രിയായിരുന്നു അപകടം.

ചുമട്ടുതൊഴിലാളിയായ രാജേന്ദ്രൻ ജോലി കഴിഞ്ഞ് വീട്ടിലെത്തിയ ശേഷം മുകളിലുള്ള വാട്ടർ ടാങ്കില്‍ വെള്ളം ഉണ്ടോ എന്ന് നോക്കാൻ കയറിയതായിരുന്നു. ടെറസിന് പാർശ്വഭിത്തിയില്ലായിരുന്നതിനാല്‍ കാല്‍വഴുതി വീണാണ് അപകടമുണ്ടായത്.

ഭാര്യ ലതാകുമാരിയും മകൻ രാഹുലും പുറത്തുപോയിരുന്ന സമയത്താണ് അപകടം നടന്നത്. മകള്‍ രാധു വീട്ടില്‍ ഉണ്ടായിരുന്നു. ശബ്ദം കേട്ട് പുറത്തിറങ്ങിയ മകളാണ് രാജേന്ദ്രനെ അവശനിലയില്‍ കണ്ടത്.

ഇതോടെ രാധു ബഹളം വച്ചു. മകളുടെ ബഹളം കേട്ട് ഓടിയെത്തിയ നാട്ടുകാർ രാജേന്ദ്രനെ വെള്ളനാട് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.