ഫോണില്‍ സംസാരിക്കുന്നതിനിടെ ഊഞ്ഞാലില്‍ കഴുത്ത് കുരുങ്ങി; തിരുവനന്തപുരത്ത് യുവാവിന് ദാരുണാന്ത്യം,,

തിരുവനന്തപുരം: ഊഞ്ഞാല്‍ കയർ കഴുത്തില്‍ കുരുങ്ങി യുവാവ് മരിച്ച നിലയില്‍. അരുവിക്കര മുണ്ടേലയിലാണ് സംഭവം.

മുണ്ടേല മാവുകോണം തടത്തരികത്ത് പുത്തൻ വീട്ടില്‍ സിന്ധു കുമാർ എന്ന് വിളിക്കുന്ന അഭിലാഷ് (27) ആണ് മരിച്ചത്.

ഇന്ന് പുലർച്ചെ നാല് മണിയോടെയാണ് വീട്ടുകാർ യുവാവിനെ മരിച്ച നിലയില്‍ കണ്ടത്. ഇന്നലെ രാത്രി 11 മണിയോടെ ഊഞ്ഞാലില്‍ ഇരുന്ന് ഫോണ്‍ വിളിക്കുന്നത് വീട്ടുകാർ കണ്ടിരുന്നു.

വീട്ടില്‍ സഹോദരിയും കുട്ടികളും മാത്രമാണ് ഉണ്ടായിരുന്നത്. സിന്ധു കുമാർ മദ്യപിച്ചിരുന്നു എന്നാണ് വിവരം. കേബിള്‍ ടിവി ജീവനക്കാരനായിരുന്നു ഇയാള്‍.

സംഭവത്തില്‍ അരുവിക്കര പൊലീസ് കേസെടുത്തിട്ടുണ്ട്. ഊഞ്ഞാലില്‍ ആടിക്കൊണ്ടിരിക്കവെ അബദ്ധത്തില്‍ കയർ കുരുങ്ങി മരണപ്പെട്ടതാവാം എന്നാണ് പൊലീസിന്റെ പ്രാഥമിക നിഗമനം.