നജഫ്ഗഡിന്റെ യഥാർഥ പേര് ‘നഹർഗഡ്’ ; മണ്ഡലത്തിന്റെ പേര് മാറ്റണമെന്ന് ബിജെപി എംഎൽഎ നിയമസഭയിൽ

ന്യൂഡൽഹി: തെക്കുപടിഞ്ഞാറൻ ഡൽഹിയിലെ നജഫ്ഗഡിന്റെ യഥാർഥ പേര് ‘നഹർഗഡ്’ എന്നായിരുന്നു എന്നും മുഗളന്മാരാണ് പേര് മാറ്റിയതെന്നുമുള്ള അവകാശവാദവുമായി ബിജെപി എംഎൽഎ നീലം പഹൽവാൻ രംഗത്തെത്തി. മണ്ഡലത്തിന്റെ പേര് മാറ്റണമെന്ന് എംഎൽഎ നിയമസഭയിൽ ആവശ്യപ്പെട്ടു.

നിയമസഭാ തിര‍ഞ്ഞെടുപ്പിനുശേഷം തലസ്ഥാനത്തെ പ്രദേശങ്ങളുടെ പേരുമാറ്റണമെന്നുള്ള നിരന്തര ആവശ്യങ്ങൾ ബിജെപി എംഎൽഎമാർ ഉന്നയിക്കുന്നുണ്ട്.

മുസ്തഫാബാദിന്റെ പേര് മാറ്റുമെന്ന് പ്രഖ്യാപിച്ച് ബിജെപി എംഎൽഎയായ മോഹൻ സിങ് ബിഷ്തും രംഗത്തെത്തിയിരുന്നു.

മുസ്‌ലിം ഭൂരിപക്ഷ പ്രദേശമായ മുസ്തഫാബാദിന്റെ പേര് ‘ശിവ് പുരി’ അല്ലെങ്കിൽ ‘ശിവ് വിഹാർ’ എന്നാക്കി മാറ്റുമെന്നാണ് മോഹൻ സിങ് പ്രഖ്യാപിച്ചത്.

നേരത്തെ ആർകെ പുരത്ത് നിന്നുള്ള എംഎൽഎ അനിൽ ശർമ, മണ്ഡലത്തിലെ മുഹമദ്പുർ എന്ന ഗ്രാമം മാധവപുരം എന്ന് മാറ്റണമെന്നും ആവശ്യപ്പെട്ടിരുന്നു.