ന്യൂഡല്ഹി: ഭോപ്പാലില്നിന്ന് ഡല്ഹിയിലേക്കുള്ള യാത്രയ്ക്കിടെ തനിക്ക് 'തകര്ന്ന' സീറ്റ് അനുവദിച്ചതില് എയര് ഇന്ത്യയ്ക്കെതിരെ രൂക്ഷവിമര്ശനവുമായി കേന്ദ്ര മന്ത്രി ശിവ്രാജ് സിങ് ചൗഹാന്. ഇത്തരത്തില് പൊട്ടിപ്പൊളിഞ്ഞ സീറ്റ് എന്തുകൊണ്ടാണ് തനിക്ക് അനുവദിച്ചതെന്ന് ജീവനക്കാരോട് ചോദിച്ചപ്പോള് ഈ സീറ്റിലേക്കുള്ള ടിക്കറ്റ് വില്ക്കരുതെന്ന് മാനജ്മെന്റിനെ അറിയിച്ചിരുന്നതായി അവര് മറുപടി നല്കിയെന്നും കേന്ദ്ര മന്ത്രി പറഞ്ഞു.
സംഭവത്തില് പ്രതികരണവുമായി എയര് ഇന്ത്യ രംഗത്തെത്തി. മന്ത്രിക്കുണ്ടായ അസൗകര്യത്തില് ക്ഷമ ചോദിക്കുന്നുവെന്ന് വ്യക്തമാക്കിയ എയര് ഇന്ത്യ സംഭവം അന്വേഷിക്കുമെന്നും കൂട്ടിച്ചേര്ത്തു. എക്സിലൂടെയാണ് മന്ത്രി ശിവ്രാജ് സിങ് ചൗഹാന് തനിക്കുണ്ടായ ദുരനുഭവം പങ്കുവെച്ചത്.
"കിസാന് മേള ഉദ്ഘാടനം ചെയ്യുന്നതിനായി ഡല്ഹിയിലേക്ക് പോകുകയായിരുന്നു ഞാന്, കൂടാതെ കുരുക്ഷേത്രയില് പ്രകൃതി കാര്ഷിക മിഷന്റെ ഒരു യോഗം നടത്താനും ചണ്ഡീഗഡില് പ്രതിഷേധിക്കുന്ന കര്ഷകരെ കാണാനും തീരുമാനിച്ചിരുന്നു. ഇതിനായി എയര് ഇന്ത്യയുടെ എഐ436 എന്ന വിമാനത്തിലാണ് ടിക്കറ്റ് ബുക്ക് ചെയ്തിരുന്നത്. എട്ട് സി എന്ന സീറ്റ് എനിക്ക് ലഭിച്ചു. ഞാന് അവിടെ പോയി ഇരുന്നു. എന്നാല്, ആ സീറ്റ് തകരുകയും ഇടിഞ്ഞ് തൂങ്ങുകയും ചെയ്തിരുന്നു. ഇരിക്കാന് ബുദ്ധിമുട്ടായിരുന്നു. ആ ഒരു സീറ്റ് മാത്രമായിരുന്നില്ല അങ്ങനെയുള്ളത്. നിരവധി സീറ്റുകള് ആ നിലയിലായിരുന്നു.
"എന്റെ സഹയാത്രികര് എന്റെ സീറ്റ് മാറ്റി അവരുടെ നല്ല സീറ്റില് ഇരിക്കാന് എന്നോട് അഭ്യര്ത്ഥിച്ചു, പക്ഷേ, ഞാന് മറ്റൊരു സുഹൃത്തിനെ എന്തിന് ബുദ്ധിമുട്ടിക്കണം, ഇതേ സീറ്റില് ഇരുന്നു യാത്ര പൂര്ത്തിയാക്കാന് ഞാന് തീരുമാനിച്ചു. ടാറ്റ ഏറ്റെടുത്ത ശേഷം എയര് ഇന്ത്യയുടെ സര്വീസ് മെച്ചപ്പെടുമെന്നായിരുന്നു എന്റെ ധാരണ, എന്നാല് അത് തെറ്റിദ്ധാരണയായിയിരുന്നു.
ഇതിന് എയര് ഇന്ത്യയുടെ മറുപടി ഇങ്ങനെയായിരുന്നു: 'സര്, ഉണ്ടായ അസൗകര്യത്തില് ഞങ്ങള് ക്ഷമ ചോദിക്കുന്നു. ഭാവിയില് ഇത്തരം സംഭവങ്ങള് ഉണ്ടാകാതിരിക്കാന് ഞങ്ങള് ഇക്കാര്യം ശ്രദ്ധാപൂര്വം പരിശോധിക്കുമെന്ന് ഉറപ്പ് നല്കുന്നു." ഇതുമായി ബന്ധപ്പെട്ട് നേരിട്ട് സംസാരിക്കാനുള്ള സമയവും ശിവ്രാജ് സിങ് ചൗഹാനോട് എയര് ഇന്ത്യ അധികൃതര് തേടി.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.