സനാതന ധർമം കേരളം ചർച്ച ചെയ്യുക തന്നെ വേണം; എം.വി. ഗോവിന്ദൻ

കോട്ടയം: സനാതന ധർമം കേരളം ചർച്ച ചെയ്യുക തന്നെ വേണമെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ. ചാതുർവർണ്യ വ്യവസ്ഥയിൽ അധിഷ്ഠിതമാണ് സനാതനധർമം. അത് ഫ്യൂഡൽ വ്യവസ്ഥയുടെ ഭാഗമാണ്.മന്നത്ത് പത്മനാഭനെ സൃഷ്ടിച്ചത് അനാചാരങ്ങൾക്കെതിരെ പോരാടിയതിന്റെ ഭാഗമായിട്ടാണ്. അല്ലെങ്കിൽ അദ്ദേഹം അറി​യപ്പെടാതെ പോയേനെയെന്ന്​ മനസിലാക്കണമെന്നും എൻ.എസ്​.എസ്​ ജന.സെക്രട്ടറിക്ക്​ മറുപടിയായി അദ്ദേഹം പറഞ്ഞു.

സി.പി.എം കോട്ടയം ജില്ല സമ്മേളനം പാമ്പാടിയിൽ ഉദ്​ഘാടനം ചെയ്യുകയായിരുന്നു അദ്ദേഹം. രാജ്യത്ത്​ ഇപ്പോൾ നിലവിലുള്ള ഭരണഘടന വേണ്ടായെന്നാണ്​ രാജ്യം ഭരിക്കുന്നവർ വാദിക്കുന്നത്. മനുസ്മൃതിയിലും ചാതുർവർണത്തിലും അധിഷ്ഠിതമായ ഭരണഘടനയാണ്​ അവർക്ക്​ ആവശ്യം. സനാതന ധർമം പദം ഉപയോഗിക്കുന്നത് കൃത്യമായ അർഥം അറിയാതെയാണ്. ചാതുർവർണ്യത്തിന്റെ പതിപ്പാണ് സനാതന ധർമം. അതിനെ ന്യായീകരിക്കാനാണ്​ കോൺഗ്രസും വി.ഡി. സതീശനും ശ്രമിക്കുന്നത്​.

ആചാരങ്ങൾ മാറ്റരുത് എന്നാണ് എൻ.എസ്​.എസ്​ ജന.സെക്രട്ടറി സുകുമാരൻ നായർ പറയുന്നത്. ആചാരങ്ങൾ മാറ്റാനുള്ളതാണ്​. ആചാരങ്ങൾ മാറ്റിയില്ലെങ്കിൽ മന്നത്ത് പത്മനാഭൻ ഇല്ല. അത് മനസ്സിലാക്കണം. നിലനിന്നിരുന്ന അനാചാരങ്ങളെയെല്ലാം എതിർത്താണ് മന്നത്ത് സാമൂഹിക പരിഷ്കരണം നടത്തിയത് എന്നും സുകുമാരൻ നായർക്ക് മറുപടിയായി എം.വി. ഗോവിന്ദൻ പറഞ്ഞു. 

ആർ.എസ്​.എസിന്‍റെ നൂറാം വാർഷികത്തിൽ ഹിന്ദുത്വ രാഷ്ട്രമുണ്ടാക്കാമെന്നതായിരുന്നു ബി.ജെ.പിയുടെ അജണ്ട. രാമക്ഷേത്രത്തെ വർഗീയപരമായി അവർ തെഞ്ഞെടുപ്പിന്​ വേണ്ടി ഉപയോഗിച്ചു. എന്നിട്ടും അയോധ്യ സ്ഥിതി ചെയ്യുന്ന സ്ഥലത്ത്​ അവർക്ക്​ ജയിക്കാനായില്ല. തെരഞ്ഞെടുപ്പിൽ ശക്​തമായ പ്രകടനം നടത്തി ഭരണം നേടാൻ കോൺഗ്രസ്​ ശ്രമിച്ചില്ല. ഇപ്പഴും ശ്രമിക്കുന്നില്ല. ശരിയായ രീതിയിൽ ബി.ജെ.പിയെ പ്രതിരോധിക്കാൻ കോൺഗ്രസിന് കഴിയുന്നില്ല. രാജ്യത്ത്​ ബി.ജെ.പി തന്നെയാണ്​ തങ്ങളുടെ മുഖ്യഎതിരാളി. എന്നുവെച്ച്​ കോൺഗ്രസിന്‍റെ തെറ്റായ നയങ്ങളെ അംഗീകരിക്കുന്നില്ലെന്നും അദ്ദേഹം പറഞ്ഞു.

വിമർശനവും സ്വയം വിമർശനവുമാണ് സി.പി.എം സമ്മേളനത്തിൽ നടക്കുന്നത്. സമ്മേളനങ്ങളിൽ അതില്ലെങ്കിൽ മാത്രമാണ് വാർത്ത. ഇത്തരം സമ്മേളനങ്ങളിലുണ്ടാകുന്ന വിമർശനങ്ങളെ ന്യൂനതയായി കാണരുതെന്ന്​ അദ്ദേഹം മാധ്യമങ്ങളോടായി പറഞ്ഞു. പാർട്ടിയുടെ ഓരോ സമ്മേളനങ്ങളിലും തിരുത്തൽ പ്രക്രിയയാണ് നടക്കുന്നത്. വിമർശനം മാത്രമല്ല അതിനുള്ള മറുപടിയും സമ്മേളങ്ങളിലുണ്ടാകാറുണ്ട്. പാർട്ടിയുടെ വളർച്ചക്കാണ്​ വിമർശനവും സ്വയം വിമർശനവുമെന്നും എം.വി. ഗോവിന്ദൻ പറഞ്ഞു.