അധ്യാപകർക്ക് സമരത്തിന് പോകാൻ സ്കൂളിന് അനധികൃതമായി അവധി നൽകി; പ്രധാനാധ്യാപകനെ അന്വേഷണവിധേയമായി സസ്‌പെൻഡ് ചെയ്തു

തിരുവനന്തപുരം: അധ്യാപകർക്ക് സമരത്തിന് പോകണമെന്ന് കാണിച്ച് വട്ടിയൂർക്കാവ് ഗവ. എൽ പി എസിന് അനധികൃതമായി അവധി നൽകിയ പ്രധാനാധ്യാപകനെ സസ്‌പെൻഡ് ചെയ്തു.

അന്വേഷണവിധേയമായി പ്രധാനാധ്യാപകനെ സസ്പെൻഡ് ചെയ്തായി മന്ത്രി വി ശിവൻകുട്ടിയാണ് അറിയിച്ചത്. സ്കൂളിന് അവധി നൽകി അധ്യാപകർ സമരത്തിന് പോവുകയായിരുന്നു. തുടര്‍ന്ന് നോർത്ത് എഇഒയുടെ നേതൃത്വത്തിൽ എത്തിയാണ് സ്കൂൾ തുറന്നത്. അധ്യാപകരും ജീവനക്കാരും സമരത്തിൽ പങ്കെടുക്കുന്നതിനാൽ ഇന്ന് ക്ലാസ് ഉണ്ടായിരിക്കുന്നതല്ലെന്നാണ് വാട്സാപ്പിൽ സന്ദേശം അയച്ചത്.

അതേസമയം, ശമ്പളപരിഷ്കരണം നടത്തുക, ലീവ് സറണ്ടർ അനുവദിക്കുക, ഡിഎ കുടിശ്ശിക നൽകുക തുടങ്ങിയ ആവശ്യങ്ങൾ ഉന്നയിച്ചാണ് അധ്യാപകരും ജീവനക്കാരും പണിമുടക്കുന്നത്. പ്രതിപക്ഷ സർവ്വീസ് സംഘടനകളും സിപിഐ സംഘടനകളുമാണ് പണിമുടക്ക് പ്രഖ്യാപിച്ചത്.

പണിമുടക്കിനെ നേരിടാൻ സർക്കാർ ഡയസ് നോൺ പ്രഖ്യാപിച്ചിട്ടുമുണ്ട്. പണിമുടക്ക് ദിവസത്തെ ശമ്പളം 2025 ഫെബ്രുവരി മാസത്തെ ശമ്പളത്തിൽ നിന്ന് കുറയ്ക്കുമെന്നാണ് അറിയിച്ചിട്ടുള്ളത്.