തമിഴ്നാട് ടൂറിസം ഫെസ്റ്റിന്റെ ഭാഗമായുള്ള ബലൂൺ പറപ്പിക്കലിൽ ഇന്ധനം തീർന്നതിനെ തുടർന്ന് അപകടത്തിൽപ്പെട്ട ഭീമൻ ബലൂൺ പാടത്തേക്കിറക്കി;

പാലക്കാട്: പൊള്ളാച്ചിയിൽ തമിഴ്നാട് ടൂറിസം വകുപ്പ് നടത്തുന്ന ഫെസ്റ്റിന്റെ ഭാഗമായുള്ള ബലൂൺ പറപ്പിക്കലിൽ ഇന്ധനം തീർന്നതിനെ തുടർന്ന് അപകടത്തിൽപ്പെട്ട ഭീമൻ ബലൂൺ പാലക്കാട് കന്നിമാരി മുള്ളൻതോട് പാടത്തേക്കിറക്കി. തമിഴ്‌നാട് പൊലീസിലെ ഉയർന്ന ഉദ്യോഗസ്ഥന്റെ 2 മക്കളും പറക്കലിനു നേതൃത്വം നൽകുന്ന 2 പേരുമാണ് ബലൂണിൽ ഉണ്ടായിരുന്നത്.

പൊള്ളാച്ചിയിൽനിന്ന് ഏകദേശം 20 കിലോമീറ്ററോളം പറന്നാണ് കന്നിമാരിയിൽ ബലൂൺ ഇറക്കിയത്. സംഭവം അറിഞ്ഞ് കമ്പനി അധികൃതരും പൊലീസും സ്ഥലത്തെത്തി കുട്ടികളെ സുരക്ഷിതരാക്കി കൊണ്ടുപോയി.

പാടത്തിറക്കിയ ബലൂൺ ചുരുട്ടിയെടുത്തു. രാവിലെ 8 മണിയോടെ ആയിരുന്നു സംഭവം.

കർഷകനായ വേലായുധൻ കുട്ടിയുടെ പാടത്താണ് ബലൂൺ വന്നിറങ്ങിയത്. തിരിച്ചു പറക്കാൻ ശ്രമിച്ചെങ്കിലും വിഫലമായി.

കർഷകന്റെ നിർദേശത്തെ തുടർന്ന് നെൽപ്പാടത്ത് ഇറക്കുകയായിരുന്നു. കൃഷി നശിച്ചാലും സുരക്ഷിതമായി കുട്ടികളെ ഇറക്കുകയായിരുന്നു ലക്ഷ്യമെന്ന് വേലായുധൻ കുട്ടി പറഞ്ഞു.