മകനിൽ നിന്നും കഞ്ചാവ് പിടികൂടിയിട്ടില്ല; ആരോപണം അടിസ്ഥാന രഹിതം; യു പ്രതിഭ എം എൽ എ

ആലപ്പുഴ: മകൻ്റെ പക്കൽനിന്നു കഞ്ചാവ് പിടികൂടിയില്ലെന്ന് യു.പ്രതിഭ.

മകനെതിരായി വന്ന വാർത്ത വ്യാജ വാർത്തയാണെന്നും  അവർ അവകാശപ്പെട്ടു. മകൻ്റെ കയ്യിൽനിന്നു കഞ്ചാവ് പിടികൂടിയെന്ന് തന്നോട് പൊലീസ് പറഞ്ഞിട്ടില്ല. മകൻ ഈ നാട്ടിലെ എല്ലാവരുമായി കൂട്ടാണ്. മകൻ്റെ കയ്യിൽനിന്നു കഞ്ചാവ് പിടിച്ചാൽ അവൻ്റെ കൂടെ നിൽക്കില്ല, താൻ മാധ്യമങ്ങളോട് തുറന്നുപറയുമായിരുന്നെന്നും പ്രതിഭ പറഞ്ഞു.

ഇല്ലാത്ത വാർത്ത ആഘോഷിച്ചതിൽ അമർഷമുണ്ട്. മകൻ്റെ ഒപ്പമുണ്ടായിരുന്നവരുടെ കാര്യം അറിയില്ല. ആ കാര്യങ്ങൾ ബാക്കി കുട്ടികളുടെ മാതാപിതാക്കളോട് ചോദിക്കണമെന്നും പ്രതിഭ പറഞ്ഞു.

യു.പ്രതിഭയുടെ മകൻ അടക്കം 9 പേരെയാണ് 3 ഗ്രാം കഞ്ചാവുമായി എക്സൈസ് പിടികൂടിയത്. തകഴി പുലിമുഖം ജെട്ടിക്ക് സമീപം ഒരു സംഘം യുവാക്കൾ ലഹരി വസ്തുക്കൾ ഉപയോഗിക്കുന്നതായി സന്ദേശം ലഭിച്ചതിനെ തുടർന്ന് നടത്തിയ പരിശോധനയിൽ കഞ്ചാവ് വലിച്ചുകൊണ്ടിരുന്ന 9 പേരെയും പിടികൂടിയതായി കുട്ടനാട് എക്‌സൈസ് അറിയിച്ചു. 

കനിവ്, സച്ചിൻ, മിഥുൻ, ജെറിൻ, ജോസഫ്, ബെൻസ്, സജിത്, അഭിഷേക്, സോജൻ എന്നിവരെയാണ് എസ്ഐ ആർ.ജയരാജും സംഘവും അറസ്റ്റ് ചെയ്തത്. 3 ഗ്രാം കഞ്ചാവ് കൈവശം വച്ചതിനും കഞ്ചാവ് വലിച്ചതിനുമാണ് കേസെടുത്തത്. പ്രതിഭയുടെ മകനെതിരെ കഞ്ചാവ് വലിച്ചതിനുള്ള എൻടിപിഎസ് 27 വകുപ്പ് മാത്രമാണു ചുമത്തിയത്. അറസ്റ്റ് ചെയ്ത പ്രതികളെ ജാമ്യത്തിൽ വിട്ടു. അതേസമയം പ്രതികളുടെ കൈവശം കൂടുതൽ കഞ്ചാവ് ഉണ്ടായിരുന്നെന്നും സ്റ്റേഷൻ ജാമ്യത്തിൽ വിടാൻ ആവശ്യമായ അളവ് കുറച്ചുകാണിക്കുകയാണ് ഉണ്ടായതെന്നും യൂത്ത് കോൺഗ്രസ് ജില്ലാ കമ്മിറ്റി ആരോപിച്ചു.