എറണാകുളം - കൊല്ലം മെമുവിന്‍റെ കോച്ചുകൾ വെട്ടിക്കുറച്ചതിൽ പ്രതിഷേധം ശക്തമാകുന്നു;

കൊല്ലം: യാത്രക്കാരുടെ തിരക്ക് വർധിക്കുന്നതിനിടെ എറണാകുളം - കൊല്ലം മെമുവിന്‍റെ കോച്ചുകൾ വെട്ടിക്കുറച്ചതിൽ പ്രതിഷേധം ശക്തമാകുന്നു. കോച്ചുകളുടെ എണ്ണം 12ൽ നിന്ന് എട്ടായാണ് റെയിൽവേ ചുരുക്കിയത്. കോച്ചുകളുടെ എണ്ണം കുറച്ചതിനെത്തുടർന്ന് ട്രെയിനിൽ കയറാനും ഇറങ്ങാനും പോലും കഴിയാതെ യാത്രക്കാർ ബുദ്ധിമുട്ടുകയാണ്. നാലു കോച്ചുകൾ അടിയന്തരമായി പുന:സ്ഥാപിക്കണമെന്ന് ആവശ്യപ്പെട്ട് റെയിൽവേ മന്ത്രിയ്ക്ക് കൊടിക്കുന്നിൽ സുരേഷ് എംപി കത്ത് നൽകി. അനുകൂല തീരുമാനം ഉടൻ ഉണ്ടാകുമെന്ന ഉറപ്പും എംപിയ്ക്ക് ലഭിച്ചിട്ടുണ്ട്.

കൊല്ലം - എറണാകുളം 06443/44 മെമ്മു സർവീസിന്‍റെ കോച്ചുകളുടെ എണ്ണം 16 ആയി ഉയർത്തണമെന്ന് ആവശ്യപ്പെടുന്നതിനിടെയാണ് 12ൽ നിന്ന് എട്ടായി ചുരുക്കിയത്. ഇത് വലിയ പ്രതിസന്ധിയ്ക്ക് ഇടയാക്കുകയും ചെയ്തു. യാത്രക്കാരും ട്രെയിൻ യാത്രക്കാരുടെ സംഘടനയായ ഫ്രണ്ട് ഓൺ റെയിൽ പ്രതിനിധികളും കഴിഞ്ഞദിവസം എംപിയെക്കണ്ട് പരാതിയും ഉന്നയിച്ചിരുന്നു.

പുലർച്ചെ കൊല്ലത്തു നിന്നും സർവീസ് ആരംഭിക്കുന്ന എറണാകുളത്തേക്കുള്ള മെമു സർവീസിൽ കോച്ചുകളുടെ എണ്ണം കുറച്ചതിനെ തുടർന്ന് യാത്രക്കാർക്ക് കയറാനും ഇറങ്ങാനും കഴിയാത്ത തരത്തിലുള്ള തിരക്കാണ് അനുഭവപ്പെട്ടത്. മേഖലയിലെ യാത്രാക്ലേശം പരിഹരിക്കാൻ കൂടുതൽ മെമു ട്രെയിനുകൾ അനുവദിക്കണമെന്ന് ആവശ്യപ്പെടുന്നതിനിടെ കോച്ചുകൾ കുറച്ചത് അക്ഷരാർഥത്തിൽ തിരിച്ചടിയാവുകയാണ്. 

കൊല്ലം - എറണാകുളം മെമു സർവീസിന്‍റെ വെട്ടിക്കുറച്ച് നാലു കോച്ചുകൾ അടിയന്തരമായി പുനസ്ഥാപിക്കണമെന്ന് ആവശ്യപ്പെട്ട് റെയിൽവേ മന്ത്രിക്ക് മാവേലിക്കര എംപി കത്ത് നൽകിയിരുന്നു. കോച്ചുകൾ വെട്ടിക്കുറച്ച് നടപടി പുനഃപരിശോധിക്കുന്നതിനായി ബന്ധപ്പെട്ട ഉദ്യോഗസ്ഥരെ ചുമതലപ്പെടുത്തിയതായി ദക്ഷിണ റെയിൽവേ ജനറൽ മാനേജറുടെ മറുപടി ലഭിച്ചിട്ടുണ്ടെന്ന് കൊടിക്കുന്നിൽ സുരേഷ് അറിയിച്ചു.

വൈകീട്ട് എറണാകുളത്തുനിന്ന് മെമു പുറപ്പെടുമ്പോൾതന്നെ കാലുകുത്താൻ സാധിക്കാത്തവിധം യാത്രക്കാർ ഇതിനകത്ത് ഉണ്ടാകും. എറണാകുളത്തു ജോലി ചെയ്തു കോട്ടയം ഭാഗത്തേക്കു മടങ്ങുന്നവർ പ്രധാനമായും ആശ്രയിക്കുന്നത് ഈ ട്രെയിനാണ്. പിന്നീടുള്ള സ്റ്റോപ്പുകളിൽ നിന്ന് ആളുകൾക്ക് കയറാനും ഇറങ്ങാനും പറ്റാത്ത അവസ്ഥയാണ് ഇപ്പോഴുള്ളത്.

വേണാട് എക്സ്പ്രസ് സൗത്ത് സ്റ്റേഷൻ ഒഴിവാക്കി എറണാകുളം നോർത്ത് വഴി കടന്നുപോകാൻ തുടങ്ങിയതോടെ എറണാകുളം - കൊല്ലം മെമുവിലെ യാത്രക്കാരുടെ എണ്ണത്തിൽ വർധനയുണ്ടായിരുന്നു. പഴയതുപോലെ 12 കോച്ചുകളുള്ള മെമു പുനഃസ്ഥാപിക്കണമെന്ന ആവശ്യം റെയിൽവേ പരിഗണിക്കുമെന്നാണ് പ്രതീക്ഷിക്കുന്നത്. ഇതിനൊപ്പം അടുത്തിടെ പുതുതായി അനുവദിച്ച കൊല്ലം - എറണാകുളം മെമു വൈകിട്ടു കൂടി സർവീസ് നടത്തണമെന്നും ആവശ്യമുണ്ട്.