കത്ത് അയക്കുന്നതിൽ അസ്വാഭാവികതയില്ല; പുറത്തായതാണ് കുഴപ്പം ;കെ സുധാകരൻ

പാലക്കാട്: പാലക്കാട് ഉപതിരഞ്ഞെടുപ്പിലെ കത്ത് വിവാദത്തിൽ പ്രതികരണവുമായി കെപിസിസി അധ്യക്ഷൻ കെ സുധാകരൻ.

കത്ത് അയക്കുന്നതിൽ അസ്വാഭാവികതയില്ലെന്നും പുറത്തായതാണ് കുഴപ്പമെന്നും കെ സുധാകരൻ പറഞ്ഞു. സംഭവത്തിൽ അന്വേഷണം നടത്തുമെന്ന് കെപിസിസി അധ്യക്ഷൻ വ്യക്തമാക്കി. ഷാഫിയാണ് രാഹുൽ മാങ്കുട്ടത്തിൻ്റെ പേര് പറഞ്ഞതെന്നും അതിനെന്താ തെറ്റെന്നും കെ സുധാകരൻ ചോദിച്ചു. പാർട്ടി എടുക്കുന്ന തീരുമാനത്തിന്നൊപ്പമാണ് എന്ന് അദ്ദേഹം പറഞ്ഞു.

മുരളീധരൻ്റെ പേരിനേക്കാൾ രാഹുലിൻ്റെ പേര് ഉയർന്ന് വന്നതാണെന്ന് അദ്ദേഹം വിശദീകരിച്ചു. പല പേരുകളും കെപിസിസി ചർച്ച ചെയ്തിട്ടുണ്ട്. അതൊന്നും ഇപ്പോൾ പുറത്തു പറയാൻ ആഗ്രഹിക്കുന്നില്ല അതെല്ലാം പാർട്ടിക്കകത്തെ കാര്യമാണെന്ന് സുധാകരൻ പറഞ്ഞു. കെ മുരളീധരനെ സ്ഥാനാർത്ഥിയാക്കണമെന്ന് ആവശ്യപ്പെടുന്നത് ജില്ലാ നേതൃത്വത്തിൻ്റെ കത്താണ് വിവാദമായത്.

പാലക്കാട് തിരഞ്ഞെടുപ്പിൽ വിവാദങ്ങൾ വിട്ടൊഴിയാത്ത പുതിയ തലവേദനയാണ് ഡിസിസിയുടെ കഥ. സ്ഥാനാർത്ഥികളെ നിർദ്ദേശിച്ചു കത്തയക്കുന്നത് സ്വാഭാവിക രീതിയാണെന്നായിരുന്നു ഡിസിസി പ്രസിഡൻ്റ് എ തങ്കപ്പൻ്റെ പ്രതികരണം. അനാവശ്യ ചർച്ചകളാണ് നടക്കുന്നത് എന്ന് പറഞ്ഞ് വി ഡി സതീശനും കെ മുരളീധരനും മറ്റ് നേതാക്കളും ഒഴിഞ്ഞു. 

കത്ത് വിവാദത്തിനു പിന്നാലെ ഷാഫി പറമ്പിലിനെതിരെ പുതിയ ആരോപണവുമായി എ.കെ ഷാനിബും രംഗത്തെത്തി. കൃപേഷിൻ്റെയും ശരത് ലാലിൻ്റെയും മൃതദേഹം ഏറ്റുവാങ്ങാൻ പാലക്കാട് ഉണ്ടായിട്ടും ഷാഫി പറമ്പിൽ പോയില്ലെന്നാണ് ആരോപണം.