എൽഡിഎഫ് അവിശ്വാസം പാസായി: ഒപ്പം നിന്ന് കോണ്‍ഗ്രസും എസ്‌ഡിപിഐയും, ബിജെപിക്ക് പഞ്ചായത്ത് ഭരണം നഷ്ടമായി

തിരുവനന്തപുരം: കരവാരം പഞ്ചായത്തില്‍ ബിജെപിക്ക് ഭരണം നഷ്ടമായി. എല്‍ഡിഎഫ് കൊണ്ടുവന്ന അവിശ്വാസ പ്രമേയം ഇന്നത്തെ കൗണ്‍സിലില്‍ പാസായതോടെയാണ് ഭരണം നഷ്ടമായത്.

പഞ്ചായത്തിലെ ഒരു കോണ്‍ഗ്രസ് അംഗവും രണ്ട് എസ്‌ഡിപിഐ അംഗങ്ങളും അവിശ്വാസ പ്രമേയത്തെ അനുകൂലിച്ചതോടെ ബിജെപി അംഗം വി ഷിബുലാലിൻ്റെ പ്രസിൻ്റ് സ്ഥാനം നഷ്ടമായി. 

ഇദ്ദേഹത്തിനെതിരെ സാമ്പത്തിക ക്രമക്കേടും അഴിമതിയും വികസന കാര്യങ്ങളില്‍ തടസ്സം നില്‍ക്കുന്നെന്ന ആരോപണങ്ങളും ഉന്നയിച്ചാണ് എല്‍ഡിഎഫ് അവിശ്വാസ പ്രമേയം കൊണ്ടുവന്നത്. പഞ്ചായത്തില്‍ ഏഴ് അംഗങ്ങളുള്ള ബിജെപിയാണ് ഏറ്റവും വലിയ ഒറ്റക്കക്ഷി.

സിപിഎമ്മിന് അഞ്ചും സിപിഐ, ജെഡിഎസ് അംഗങ്ങളും ചേർന്ന് എല്‍ഡിഎഫില്‍ ഏഴ് പേരാണ് ഉള്ളത്. അവശേഷിക്കുന്ന മൂന്ന് അംഗങ്ങളില്‍ ഒരാള്‍ കോണ്‍ഗ്രസും 2 പേർ എസ്‌ഡിപിഐയുമാണ്.