സൂക്ഷിക്കുക, കാത്ത് നിൽക്കും ഇത്തരക്കാർ: വ്യാജ സ്ക്രീൻഷോട്ട് കാണിച്ച് ഗൂഗിള്‍ പേ ചെയ്യാമെന്ന് പറയും, തട്ടിപ്പ് നടത്തിയ രണ്ട് പേര്‍ പിടിയില്‍

കോഴിക്കോട്: വ്യാജ സ്ക്രീൻ ഷോട്ട് കാണിച്ചു കബളിപ്പിക്കല്‍ നടത്തിയ രണ്ട് പേരെ കോഴിക്കോട് കസബ പൊലീസ് പിടികൂടി. നടക്കാവ് സ്വദേശി സെയ്ത് ഷമീം, കുട്ടിക്കാട്ടൂർ സ്വദേശി അനീഷ എന്നിവരാണ് പിടിയിലായത്.

എടിഎമ്മില്‍ നിന്ന് പണം എടുക്കാൻ വരുന്നവരെ കാത്ത് എടിഎം കൗണ്ടറിന് മുന്നില്‍ നില്‍ക്കുകയും പണം എടുക്കാൻ വരുന്നവരോട് പൈസ തരാമോ ഗൂഗിള്‍ പേ ചെയ്യാം എന്നു പറഞ്ഞ ശേഷം വ്യാജ സ്ക്രീൻ ഷോട്ട് കാണിച്ച്‌ പറ്റിക്കുകയും ചെയ്യുകയായിരുന്നു.

കഴിഞ്ഞ ദിവസം രാത്രി മാവൂർ റോഡില്‍ വെച്ചാണ് ഇരുവരും പിടിയിലായത്. മറ്റൊരു എടിഎമ്മിന് മുന്നില്‍ നിന്ന് തട്ടിപ്പിന് ഒരുങ്ങുമ്പോഴാണ് ഇരുവരെയും പൊലീസ് പിടികൂടിയത്.