സഹായിക്കാനെത്തി മരണം ഏറ്റുവാങ്ങി: കാബിനും ടിപ്പറിനും ഇടയില്‍ കുരുങ്ങി യുവാവിന് ദാരുണാന്ത്യം,

കോതമംഗലം: ടിപ്പർ ലോറിയുടെ കാബിനും ടിപ്പറിനും ഇടയില്‍ കുരുങ്ങി യുവാവിന് ദാരുണാന്ത്യം. ആയക്കാട് കളരിക്കല്‍ പരേതനായ കുര്യാക്കോസിന്റെ മകൻ ബേസിലാണ് (40) മരിച്ചത്.

ആയക്കാട് പുലിമലയിലായിരുന്നു അപകടം. ലോറിയില്‍നിന്ന് ലോഡിറക്കിയശേഷം ടിപ്പർ താഴ്ത്തുമ്പോള്‍ സമീപത്തെ വീട്ടിലേക്കുള്ള വൈദ്യുതി കണക്ഷന്‍റെ സർവിസ് വയർ ടിപ്പർ ലോറിയുടെ കാബിനും ടിപ്പറിനും ഇടയില്‍ കുരുങ്ങി. 

സഹായത്തിനെത്തിയ ബേസില്‍ കാബിന് മുകളില്‍ കയറി സർവിസ് വയർ ഉയർത്തിയപ്പോള്‍ ലിവറില്‍ ചവിട്ടിയതോടെ ടിപ്പർ താഴുകയായിരുന്നു.

അപകടംകണ്ട് ഓടിക്കൂടിയ നാട്ടുകാർ ബേസിലിനെ എടുത്ത് ആശുപത്രി എത്തിച്ചെങ്കിലും രക്ഷിക്കാനായില്ല. മാതാവ് മേരി. സഹോദരൻ: ബിനു.