പാലക്കാട് ശക്തമായ ത്രികോണ മത്സരം നടന്നാൽ നേട്ടം ബിജെപിക്ക്; പൊതു സ്ഥാനാർഥിയെ നിർത്തണം; പി.വി. അൻവർ

പാലക്കാട്∙ പാലക്കാട് ഉപതിരഞ്ഞെടുപ്പിൽ ശക്തമായ ത്രികോണ മത്സരം നടന്നാൽ നേട്ടം ബിജെപിക്കാവുമെന്ന് പി.വി. അൻവർ. രണ്ട് മുന്നണികളും അവരവരുടെ വോട്ടുപിടിച്ചാൽ ബിജെപിക്ക് അനായാസം ജയിക്കാനാവും. ബിജെപി ജയിക്കാതിരിക്കാൻ മതേതര ജനാധിപത്യ ശക്തികൾ ഒന്നിച്ചു നിൽക്കണം. സംസ്ഥാന നേതാവ് സുരേന്ദ്രനെ വരെ ബിജെപി സ്ഥാനാർഥിയായി ആലോചിക്കുന്നത് ജയിക്കുമെന്ന് ഉറപ്പുള്ളത് കൊണ്ടാണെന്നും അൻവർ പറഞ്ഞു.

ഇന്ത്യാ സഖ്യത്തിന്റെ ഭാഗമായ സിപിഎമ്മും കോൺഗ്രസും പരസ്പരം ആലോചിച്ച് പാലക്കാട് പൊതു സ്ഥാനാർഥിയെ നിർത്തണം. ബിജെപിയുടെ ജയം തടയുകയാണ് വേണ്ടത്. ഇത് രാജ്യത്താകെ മതേതര കക്ഷികൾക്കും ന്യൂനപക്ഷങ്ങൾക്കും ആശ്വാസമാകും. കേരളത്തിൽ ബിജെപിക്ക് സീറ്റ് കൊടുക്കുന്നത് കേരളത്തിന്റെ മതേതര പുരോഗമന പാരമ്പര്യത്തിനു കളങ്കമാകുമെന്നും അൻവർ പറഞ്ഞു.

ഇടത് - വലത് മുന്നണികൾ ആലോചിച്ച് ഇക്കാര്യത്തിൽ തീരുമാനമെടുക്കണം. അല്ലെങ്കിൽ തൃശൂർ ഇവിടേയും ആവർത്തിക്കും. പൊതുസ്ഥാനാർഥിയെ പാലക്കാട് നിർത്തുകയാണെങ്കിൽ ഡിഎംകെ പിന്തുണയ്ക്കുന്ന സ്ഥാനാർഥിയെ പിൻവലിച്ച് പൊതുസ്ഥാനാർഥിക്കായി പ്രചാരണത്തിനിറങ്ങുമെന്നും അൻവർ പറഞ്ഞു.