തിരുവനന്തപുരം: ശബരിമല തീർഥാടനത്തോടനുബന്ധിച്ച് കൂടുതല് വിപുലമായ ആരോഗ്യ സേവനങ്ങള് ഉറപ്പാക്കുമെന്ന് ആരോഗ്യമന്ത്രി വീണാ ജോര്ജ്. കോന്നി മെഡിക്കല് കോളജ് ബേസ് ആശുപത്രിയായി പ്രവര്ത്തിക്കും. ഇതിനായി മെഡിക്കല് കോളജില് മതിയായ സൗകര്യങ്ങളൊരുക്കും. പത്തനംതിട്ട ജനറല് ആശുപത്രിയില് അടിയന്തര കാര്ഡിയോളജി ചികിത്സയും കാത്ത് ലാബ് ചികിത്സയും ലഭ്യമാക്കും.
മികച്ച ചികിത്സയോടൊപ്പം പകര്ച്ചവ്യാധി പ്രതിരോധവും മുന്നില്കണ്ടുള്ള നടപടികള് സ്വീകരിക്കാന് നിര്ദേശം നല്കി. ഭക്ഷ്യസുരക്ഷാ വകുപ്പിന്റെ പ്രത്യേക സ്ക്വാഡുകള് കര്ശന പരിശോധനകള് നടത്തും. ഭക്ഷ്യ സ്ഥാപനങ്ങളിലെ ജീവനക്കാര്ക്ക് ഹെല്ത്ത് കാര്ഡ് നിര്ബന്ധമാണ്. പമ്പ ആശുപത്രിയില് വിപുലമായ കണ്ട്രോള് റൂം സ്ഥാപിക്കും.
മണ്ഡലകാലം ആരംഭിക്കുന്നതിന് മുൻപു മതിയായ സംവിധാനങ്ങള് ഒരുക്കാനും ജീവനക്കാരെ നിയോഗിക്കാനും നിര്ദേശം നല്കി. വിവിധ സ്പെഷാലിറ്റികളിലെ ഡോക്ടര്മാരെ ആരോഗ്യ വകുപ്പില്നിന്നും മെഡിക്കല് വിദ്യാഭ്യാസ വകുപ്പില്നിന്നും നിയോഗിക്കും. മെഡിക്കല് കോളജുകളില്നിന്നു വിദഗ്ധ കാര്ഡിയോളജി ഡോക്ടര്മാരെയും ഫിസിഷ്യന്മാരെയും എത്തിക്കും.
സന്നിധാനം, പമ്പ, നിലയ്ക്കല്, ചരല്മേട് (അയ്യപ്പന് റോഡ്), നീലിമല, അപ്പാച്ചിമേട് എന്നീ സ്ഥലങ്ങളില് വിദഗ്ധ സംവിധാനങ്ങളോടു കൂടിയ ഡിസ്പെന്സറികള് പ്രവര്ത്തിക്കും. പമ്പയിലെയും സന്നിധാനത്തെയും ആശുപത്രികള് നവംബര് 1 മുതല് പ്രവര്ത്തിക്കും. ബാക്കിയുള്ളവ നവംബര് 15 മുതല് പ്രവര്ത്തനമാരംഭിക്കും. എല്ലാ ആശുപത്രികളിലും ഡിഫിബ്രിലേറ്റര്, വെന്റിലേറ്റര്, കാര്ഡിയാക് മോണിറ്റര് എന്നിവയുണ്ടാകും.
നിലയ്ക്കലും പമ്പയിലും പൂര്ണ സജ്ജമായ ലാബ് സൗകര്യമുണ്ടാകും. പമ്പയിലും സന്നിധാനത്തും ഓപ്പറേഷന് തിയറ്ററുകള് പ്രവര്ത്തിക്കും. പന്തളം വലിയ കോയിക്കല് ക്ഷേത്രത്തില് താൽക്കാലിക ഡിസ്പെന്സറിയുണ്ടാകും. മതിയായ ആംബുലന്സ് സൗകര്യങ്ങളും ക്രമീകരിക്കും.
അടൂര് ജനറല് ആശുപത്രി, റാന്നി താലൂക്ക് ആശുപത്രി, തിരുവല്ല ജില്ലാ ആശുപത്രി, കോഴഞ്ചേരി ജില്ലാ ആശുപത്രി, റാന്നി പെരിനാട് സാമൂഹികാരോഗ്യ കേന്ദ്രം, ഇതുകൂടാതെ എരുമേലി, കോഴഞ്ചേരി, മുണ്ടക്കയം, വണ്ടിപ്പെരിയാര്, കുമളി, ചെങ്ങന്നൂര് തുടങ്ങി 15 ആശുപത്രികളില് പ്രത്യേക ചികിത്സാ സൗകര്യം ഒരുക്കും. കോട്ടയം മെഡിക്കല് കോളജിലും തീർഥാടകര്ക്കായി മികച്ച സൗകര്യമുണ്ടാകും.
പമ്പ മുതല് സന്നിധാനം വരെയുള്ള കാല്നടയാത്രയില് തീർഥാടകര്ക്ക് അമിതമായ നെഞ്ചിടിപ്പ്, ശ്വാസംമുട്ടല്, നെഞ്ചുവേദന തുടങ്ങിയ ആരോഗ്യ പ്രശ്നങ്ങളോ ചിലപ്പോള് ഹൃദയാഘാതം വരെയോ ഉണ്ടാകാന് സാധ്യതയുണ്ട്. ഇത്തരം പ്രശ്നങ്ങള് ഫലപ്രദമായി നേരിടാന് ആരോഗ്യവകുപ്പ് ഈ വഴികളില് അടിയന്തര ചികിത്സാ കേന്ദ്രങ്ങള് ഏര്പ്പെടുത്തും.
.jpg)
എമര്ജന്സി മെഡിക്കല് സെന്ററുകള്, ഓക്സിജന് പാര്ലറുകള് എന്നിവ പമ്പ മുതല് സന്നിധാനം വരെയുള്ള യാത്രയ്ക്കിടയില് 15 സ്ഥലങ്ങളിൽ സ്ഥാപിക്കും. കാനനപാതയില് 4 എമര്ജന്സി സെന്ററുകളും തുടങ്ങും. ഹൃദയാഘാതം സംഭവിക്കുന്ന തീർഥാടകര്ക്കായി ഓട്ടമേറ്റഡ് എക്സ്റ്റേണല് ഡിബ്രിഫ്രിലേറ്റര് ഉള്പ്പെടെ പരിശീലനം ലഭിച്ച സ്റ്റാഫ് നഴ്സുമാര് 24 മണിക്കൂറും ഈ കേന്ദ്രങ്ങളില് ലഭ്യമാക്കാനും തീരുമാനിച്ചു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.