വായ്പ മുടങ്ങി:കോളജ് ജപ്തി ചെയ്ത് ബാങ്ക് മലയാളി വിദ്യാര്‍ഥികളടക്കം പെരുവഴിയില്‍,

ബംഗളൂരു: കർണാടകയിലെ കോലാറില്‍ നഴ്സിങ് കോളജ് കെട്ടിടം ബാങ്ക് അധികൃതർ ജപ്തി ചെയ്തതോടെ വിദ്യാർഥികള്‍ പെരുവഴിയിലായി.

കെ.ജി.എഫ് ഊർഗം പേട്ടിലെ കെ.കെ.ഇ.സി.എസ് നഴ്സിങ് കോളജിലാണ് സംഭവം. കോളജ് കെട്ടിടം സീല്‍ ചെയ്തതോടെ താല്‍ക്കാലിക സംവിധാനമെന്ന നിലയില്‍ സമീപത്തെ സ്കൂള്‍ കെട്ടിടത്തിലേക്ക് വിദ്യാർഥികളെ മാറ്റി. എന്നാല്‍, വിദ്യാർഥികള്‍ക്ക് ബദല്‍ പഠനസൗകര്യം ഒരുക്കുന്ന കാര്യത്തില്‍ ഇതുവരെ തീരുമാനമായിട്ടില്ല.

ഹോസ്റ്റല്‍ കെട്ടിടത്തില്‍നിന്ന് വിദ്യാർഥികളുടെ കിടക്കയും മറ്റു സാധനങ്ങളുമെല്ലാം പുറത്തേക്കിറക്കി. നിരവധി മലയാളി വിദ്യാർഥികള്‍ ഈ കോളജില്‍ പഠിക്കുന്നുണ്ട്.