പാലക്കാട്: എക്സൈസ് സംഘത്തെ കണ്ട് ഭയന്ന് പുഴയില്‍ ചാടിയ 17-കാരന്റെ മൃതദേഹം കിട്ടി. വല്ലപ്പുഴ സ്വദേശി കളത്തില്‍ ഷംസുവിന്റെ മകൻ സുഹൈറിന്റെ മൃതദേഹമാണ് തൂതപ്പുഴയില്‍നിന്ന് കണ്ടെത്തിയത്.
വെള്ളിയാഴ്ച വൈകീട്ടാണ് കുലുക്കല്ലൂർ ആനക്കല്‍ നരിമടയ്ക്ക് സമീപത്തുവെച്ച്‌ സുഹൈർ പുഴയില്‍ ചാടിയത്. എക്സൈസ് സംഘത്തിന്റെ വരവറിഞ്ഞ് ചിതറിയോടിയ സംഘത്തിലുണ്ടായിരുന്ന ഇയാള്‍ പുഴയില്‍ ചാടിയിരുന്നെന്ന സുഹൃത്തിന്റെ മൊഴിയുടെ അടിസ്ഥാനത്തിലാണ് തിരച്ചില്‍ നടത്തിയത്.
വീട്ടുകാരുടെ പരാതിയെത്തുടർന്ന് പട്ടാമ്പി അഗ്നിരക്ഷാസേനയും പാലക്കാട്ടുനിന്നുള്ള അഗ്നിരക്ഷാസേനയുടെ മുങ്ങല്‍വിദഗ്ധരും ശനിയാഴ്ച രാവിലെ 7.30 മുതല്‍ വൈകീട്ട് 5.30 വരെ പുഴയില്‍ തിരച്ചില്‍ നടത്തിയെങ്കിലും സുഹൈറിനെ കണ്ടെത്താനായിരുന്നില്ല.
പുഴയില്‍ തണുപ്പുകൂടിയതിനാല്‍ ശനിയാഴ്ച വൈകീട്ടോടെ തിരച്ചില്‍ നിർത്തിയിരുന്നു. തുടർന്ന് ഞായറാഴ്ച രാവിലെയാണ് മൃതദേഹം കിട്ടിയത്.
വെള്ളിയാഴ്ച വൈകീട്ട് സുഹൈർ ഉള്‍പ്പെടെ എട്ടുപേർ ആനക്കല്‍ നരിമട ഭാഗത്ത് നില്‍ക്കുകയായിരുന്നു. ഇതിനിടെ, പട്ടാമ്പി റേഞ്ച് എക്സൈസ് സംഘം പട്രോളിങ്ങിനെത്തിയിരുന്നു. ഇതുകണ്ട് ഇവർ ചിതറിയോടി. ഇവരില്‍ നാലുപേർക്കെതിരേ എക്സൈസ് കേസെടുത്തു.
ഇതിനിടെ, പുഴയില്‍ ചാടി നീന്തിയെത്തിയ യുവാവാണ് സുഹൃത്തായ സുഹൈർ പുഴയില്‍ ചാടിയിരുന്നെന്ന് രാത്രി 10 മണിയോടെ വീട്ടുകാരെ അറിയിച്ചത്. ശനിയാഴ്ച രാവിലെയും കണ്ടെത്താൻ കഴിയാത്തതിനെത്തുടർന്ന് വീട്ടുകാർ ചെർപ്പുളശ്ശേരി പോലീസില്‍ പരാതി നല്‍കുകയായിരുന്നു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.