ബസുകളുടെ മത്സരയോട്ടം.: സി.പി.എം. കോഴിക്കോട് ജില്ലാ സെക്രട്ടറി പി. മോഹനൻ സഞ്ചരിച്ച കാറിനുപിന്നില്‍ ബസ്സിടിച്ചു,

കോഴിക്കോട്: സി.പി.എം. കോഴിക്കോട് ജില്ലാസെക്രട്ടറി പി. മോഹനനും ജില്ലാസെക്രട്ടേറിയറ്റ് അംഗവും കെ.എസ്.കെ.ടി.യു. ജില്ലാസെക്രട്ടറിയുമായ കെ.കെ. ദിനേശനും സഞ്ചരിച്ച കാറിന് പിന്നില്‍ സ്വകാര്യബസ്സിടിച്ചു. 

കോഴിക്കോട്-കണ്ണൂർ റൂട്ടിലോടുന്ന സ്വകാര്യബസാണ് ഇടിച്ചത്. തിങ്കളാഴ്ച വൈകീട്ട് നാലുമണിയോടെയായിരുന്നു അപകടം. കോഴിക്കോട്ടുനിന്ന് കൊയിലാണ്ടി ഭാഗത്തേക്ക് വരുകയായിരുന്നു പി. മോഹനനും ദിനേശനും. 

ചേമഞ്ചേരി വെറ്റിലപ്പാറയില്‍ പുതുതായി നിർമിച്ച സർവീസ്റോഡിലൂടെ വരുമ്പോള്‍ കാറിനുപിന്നില്‍ ബസ്സിടിക്കുകയായിരുന്നു. സുനില്‍ എന്നയാളാണ് കാർ ഓടിച്ചിരുന്നത്. അപകടത്തില്‍ ആർക്കും പരിക്കില്ല.

കോഴിക്കോട്ടുനിന്ന് കണ്ണൂരിലേക്ക് പോകുകയായിരുന്ന 'കിങ് കൊഗർ' എന്ന ബസാണ് കാറിനിടിച്ചത്. കാറിന്റെ പിൻഭാഗത്ത് കേടുപാടുകള്‍ സംഭവിച്ചു. അപകടത്തെത്തുടർന്ന് അല്പനേരം ഗതാഗത തടസ്സമുണ്ടായി. കൊയിലാണ്ടി പോലീസ് സ്ഥലത്തെത്തി.

വേണ്ടത്ര വീതിയില്ലാത്ത സർവീസ് റോഡില്‍പോലും ബസുകള്‍ മറ്റു വാഹനങ്ങളെ മറികടന്ന് ഓടുന്നത് പതിവാണ്. പലസ്ഥലത്തും റോഡ് തകർന്നുകിടപ്പാണ്. ഇതിനിടയിലൂടെയാണ് ബസുകളുടെ മത്സരയോട്ടം.