ഡ്രഡ്ജര്‍ രാവിലെ അപകടസ്ഥലത്ത് എത്തിക്കും; ഷിരൂരില്‍ അര്‍ജുനായി തിരച്ചില്‍ ഇന്ന് പുനരാരംഭിക്കും,

ബംഗളൂരു: കർണാടകയില്‍ മണ്ണിടിച്ചിലില്‍ കാണാതായ കോഴിക്കോട് കണ്ണാടിക്കല്‍ സ്വദേശി അർജുനും മറ്റ് രണ്ട് പേർക്കും വേണ്ടിയുള്ള തെരച്ചില്‍ ഇന്ന് ആരംഭിച്ചേക്കും .

ഇന്ന് രാവിലെ എട്ട് മണിയോടെ ഡ്രഡ്ജർ മണ്ണിടിച്ചില്‍ ഉണ്ടായ സ്ഥലത്ത് എത്തിക്കാനാകുമെന്നാണ് ബന്ധപ്പെട്ടവരുടെ വിലയിരുത്തല്‍. അതെ സമയം ഡ്രെഡ്ജർ എത്തിയ ഉടനെ തന്നെ തെരച്ചില്‍ തുടങ്ങാൻ കഴിയില്ല. 

ഡ്രഡ്ജർ നിശ്ചിത സ്ഥാനത്ത് ഉറപ്പിക്കാൻ 4-5 മണിക്കൂർ വേണ്ടി വരും. നാവികസേനയുടെ ഡൈവർമാരുടെ സംഘം ഇന്ന് ഉച്ചയ്ക്ക് ശേഷം എത്തുമെന്നാണ് കരുതുന്നത്.

പുഴയിലെ അടിത്തട്ടിന്റെ സ്ഥിതി വിലയിരുത്തി നാവികസേനയുടെ നിർദേശം കൂടി കണക്കിലെടുത്ത് ജില്ലാ ഭരണകൂടം തുടർനടപടി നിശ്ചയിക്കുക. നാവികസേന നടത്തിയ സോണാർ സിഗ്നലുകള്‍ വിലയിരുത്തി ഇന്ന് ജില്ലാ ഭരണകൂടത്തിന് വിവരം കൈമാറും. 

സിപി 4 എന്ന് നാവികസേന മാർക്ക് ചെയ്ത പുഴയുടെ മധ്യഭാഗത്ത് തുരുത്തിന് സമീപം ആകും ആദ്യം തെരയുക. അവിടത്തെ നദിയുടെ അടിത്തട്ടിന്റെ സ്ഥിതി ആണ് സോണാർ പ്രധാനമായും വെച്ച്‌ പരിശോധിച്ചത്. 

പുഴയുടെ അടിത്തട്ടില്‍ വലിയ തടസം ഉണ്ടാവാം എന്നാണ് വിലയിരുത്തല്‍. ഇത് നീക്കം ചെയ്യുക എന്നതാണ് ആദ്യ ദൗത്യം. ഒരു പക്ഷെ അർജുൻ ഇവിടെ കുടുങ്ങി കിടക്കാനും സാധ്യതയുണ്ട്.