കൊച്ചുവേളിയിൽ നിന്ന് ബിഹാറിലേക്ക് സ്പെഷ്യൽ ട്രെയിൻ സർവീസുമായി സതേൺ റെയിൽവേ;ഇരുദിശകളിലേക്കും ഓരോ സർവീസാണ് പ്രഖ്യാപിച്ചിരിക്കുന്നത്

തിരുവനന്തപുരം: യാത്രക്കാരുടെ തിരക്ക് കണക്കിലെടുത്ത് കൊച്ചുവേളിയിൽ നിന്ന് ബിഹാറിലേക്ക് സ്പെഷ്യൽ ട്രെയിൻ സർവീസുമായി സതേൺ റെയിൽവേ. ബിഹാറിലെ ബറൗണിയിലേക്കാണ് സ്പെഷ്യൽ ട്രെയിൻ സർവീസ് നടത്തുക.

06091 കൊച്ചുവേളി - ബറൗണി സ്പെഷ്യൽ ട്രെയിൻ നാളെയും (ജൂലൈ 20 ശനിയാഴ്ച), 06092 ബറൗണി - കൊച്ചുവേളി ട്രെയിൻ ചൊവ്വാഴ്ചയു (ജൂലൈ 23) മാണ് സർവീസ് ക്രമീകരിച്ചിരിക്കുന്നത്. 

ഇരുദിശകളിലേക്കും ഓരോ സർവീസാണ് പ്രഖ്യാപിച്ചിരിക്കുന്നത്. കൊച്ചുവേളിയിൽ നിന്ന് നാളെ രാവിലെ എട്ട് മണിയ്ക്ക് പുറപ്പെടുന്ന ട്രെയിൻ മൂന്നാം ദിവസം ഉച്ചയ്ക്ക് 02:30നാണ് ബറൗണിയിൽ എത്തിച്ചേരുക. 

ചൊവ്വാഴ്ച രാത്രി 11:30ന് യാത്ര ആരംഭിക്കുന്ന ട്രെയിൻ നാലാം ദിവസം ഉച്ചയ്ക്ക് 01:30ന് കൊച്ചുവേളിയിലെത്തിച്ചേരും. ഒൻപത് സ്ലീപ്പർ ക്ലാസ് കോച്ചുകളും 11 ജനറൽ സെക്കൻഡ് ക്ലാസ് കോച്ചുകളുമാണ് സ്പെഷ്യൽ ട്രെയിനിനുള്ളത്.

സർവീസിന്‍റെ ടിക്കറ്റ് റിസർവേഷൻ ആരംഭിച്ചിട്ടുണ്ട്. 

 കൊച്ചുവേളിയിൽ നിന്ന് പുറപ്പെടുന്ന സ്പെഷ്യൽ ട്രെയിനിന് കൊല്ലം , കായംകുളം , മാവേലിക്കര , ചെങ്ങന്നൂർ , തിരുവല്ല , ചങ്ങനാശേരി , കോട്ടയം , എറണാകുളം ടൗൺ , ആലുവ , തൃശൂർ , പാലക്കാട് എന്നിവിടങ്ങളിലാണ് കേരളത്തിൽ സ്റ്റോപ്പുകളുള്ളത്. തുടർന്ന് കോയമ്പത്തൂർ വഴി സർവീസ് തുടരും. 

ബിഹാർ യാത്രയിൽ കൊല്ലം 09:00, കായംകുളം 09:42, മാവേലിക്കര 09:53, ചെങ്ങന്നൂർ 10:03, തിരുവല്ല 10:14, ചങ്ങനാശേരി 10:26, കോട്ടയം 10:42, എറണാകുളം ടൗൺ 11:45, ആലുവ 12:08, തൃശൂർ 01:00, പാലക്കാട് 02:35 എന്നിങ്ങനെയാണ് ട്രെയിൻ എത്തുന്ന സമയം. 

ബറൗണിയിൽ നിന്ന് കേരളത്തിലേക്കുള്ള യാത്രയിൽ വെള്ളിയാഴ് രാവിലെ 05:40നാണ് ട്രെയിൻ പാലക്കാട് എത്തുക. തുടർന്ന് തൃശൂർ 06:57, ആലുവ 07:58, എറണാകുളം ടൗൺ 08:35, കോട്ടയം 10:10, ചങ്ങനാശേരി 10:30, തിരുവല്ല 10:40, ചെങ്ങന്നൂർ 10:52, മാവേലിക്കര 11:07, കായംകുളം 11:18, കൊല്ലം 12:07 സ്റ്റേഷനുകൾ പിന്നിട്ട് ഉച്ചയ്ക്ക് 01:30ന് കൊച്ചുവേളിയിലെത്തും. നേരത്തെയും റൂട്ടിൽ സ്പെഷ്യൽ ട്രെയിൻ സർവീസ് നടത്തിയിരുന്നു.