ചേർത്തലയില്‍ വീടിന് തീ പിടിച്ചു: ഷോർട്ട് സർക്യുട്ടെന്ന് സംശയം,

ചേർത്തല: ചേർത്തലയില്‍ വീട് കത്തി നശിച്ചു. നഗരസഭയിലെ 13-ാം വാർഡില്‍ ചേർത്തല ദേവീക്ഷേത്രത്തിന് സമീപം പുത്തൻ വീട്ടില്‍ ദിവാകരൻ - സുശീല ദമ്പതികളുടെ വീടാണ് കത്തിനശിച്ചത്.

ഇന്നലെ ഉച്ചയോടെ ആയിരുന്നു സംഭവം  വീട്ടു ജോലികള്‍ക്കായി പോകുന്ന ദമ്പതികള്‍ പുറത്ത് പോയ സമയത്താണ് തീ പിടിച്ചത്. 

മുറിയില്‍ വച്ചിരുന്ന മോട്ടോർ പമ്പില്‍ നിന്നുണ്ടായ ഷോർട്ട് സർക്യൂട്ടാണ് തീപിടിച്ചതിന് കാരണമെന്ന് കരുതുന്നു. സുശീലയുടെ സഹോദരി കിടപ്പ് രോഗിയായ പുഷ്പ (40) ഈ സമയത്ത് വീട്ടിലുണ്ടായിരുന്നു. 

ഇവരെ ഓടിക്കൂടിയവർ പുറത്തെത്തിച്ചു. മുറിയിലുണ്ടായിരുന്ന ഉപകരണങ്ങളും അലമാരയില്‍ സൂക്ഷിച്ചിരുന്ന രേഖകളും കത്തി നശിച്ചു. ചേർത്തല അഗ്നിശമന സേന എത്തിയാണ് തീ അണച്ചത്.