പ്രതിസന്ധി അയഞ്ഞു ഇനി ചാളകൂട്ടി ചോറുണ്ണാം

ആലപ്പുഴ :നീട്ടുവലയുമായി തീരക്കടലിൽ ഇറങ്ങിയ മൂടുവെട്ടി, ചെറുവള്ളങ്ങൾക്ക് വലനിറയെ നെയ്ച്ചാള ലഭിച്ചു.

വലിയ ഇൻബോഡ് വള്ളങ്ങൾക്കു 2 മുതൽ 4 ലക്ഷം രൂപയ്ക്കു വരെ പൂവാലൻചെമ്മീനും കിട്ടി. ചെമ്മീൻ കിലോഗ്രാമിന് 200 രൂപയായിരുന്നു വില. കി.ഗ്രാമിന് 220 രൂപയിൽ തുടങ്ങിയ ചാള വൻതോതിൽ എത്തിയതോടെ 180 രൂപയായി കുറഞ്ഞു.  

രാവിലെ 7 മുതൽ വലനിറയെ ചാളയുമായി കാളമുക്ക് ഹാർബറിൽ എത്തിയ ചെറുവള്ളങ്ങൾ വലയിൽകുടുങ്ങിയ ചാള വേർപെടുത്തിയെടുക്കാൻ ഏറെ സമയമെടുത്തു.

കഴിഞ്ഞ 4 മാസമായി കടുത്ത പ്രതിസന്ധിയിലായിരുന്ന മീൻപിടിത്തമേഖല ജൂൺ പകുതി കഴിഞ്ഞിട്ടും മാറ്റമില്ലാതെ തുടരുന്നതിൽ മത്സ്യത്തൊഴിലാളികളും അനുബന്ധ മേഖലയിൽ പണിയെടുക്കുന്നവരും ഏറെ ആശങ്കയിലായിരുന്നു. 

ചെറിയ തോതിലാണെങ്കിലും ചാളയും ചെമ്മീനും പ്രത്യക്ഷപ്പെട്ടത് പ്രതീക്ഷ നൽകുന്നതാണെന്ന് മത്സ്യത്തൊഴിലാളികൾ പറഞ്ഞു.