ടയർ മാറ്റാൻ റോ‌ഡ് സൈഡില്‍ നിര്‍ത്തി‌യിട്ട കാറിന് പിന്നില്‍ ലോറി‌യിടിച്ചു; രണ്ടുവയസുകാരന് ദാരുണാന്ത്യം; എട്ടുപേര്‍ക്ക് ഗുരുതര പരിക്ക്

 കോഴിക്കോ‌ട്: കൊയിലാണ്ടി പാലക്കുളത്ത് നിർത്തിയിട്ട കാറിന് പിന്നില്‍ ലോറി ഇടിച്ച്‌ രണ്ടുവയസുകാരൻ മരിച്ചു. വടകര ചോറോട് സ്വദേശി മുഹമ്മദ് റഹീസ് ആണ് മരിച്ചത്.ഇന്ന്ഉച്ചയ്ക്ക് 12.15നാണ് സംഭവം.

അപകടത്തില്‍ എട്ട് പേർക്ക് സാരമായി പരിക്കേറ്റു. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്.

ഷെഫീർ (45), സെയ്ഫ് (14), ഫാത്തിമ (17), ജുനൈദ് (37), സുഹറ (55), ഗോപി (55) എന്നിവർക്കാണ് പരിക്കേറ്റത്. ഇവർ കൊയിലാണ്ടി താലൂക്ക് ആശുപത്രിയിലും കോഴിക്കോട് മെഡിക്കല്‍ കോളേജിലുമായി ചികിത്സയിലാണ്.

ടയർ പഞ്ചറായതിനെത്തുടർന്ന് പാലക്കുളത്ത് റോഡ് സൈഡില്‍ കാർ നിർത്തിയിട്ട്, ടയർ മാറ്റുകയായിരുന്നു. ചൂട് കൊണ്ട് യാത്രക്കാർ കാറിന് പുറത്തുനില്‍ക്കുകയായിരുന്നുവെന്നാണ് വിവരം.

ഇതിനിടയില്‍ ലോറി ആദ്യം കാറിന് പിന്നിലുണ്ടായിരുന്ന മിനി ലോറിയില്‍ ഇടിച്ചു. പിന്നാലെ കാറും ഇടിച്ചുതെറിപ്പിച്ചു. രണ്ട് പേർ കാറിനടിയില്‍പ്പെട്ടു. ഇവരെ ഫയർഫോഴ്സെത്തിയാണ് പുറത്തെടുത്തത്.