വീടും സ്ഥലവും വിറ്റ് വാടക ക്വാർട്ടേഴ്സിൽ താമസിക്കാനെത്തിയ മധ്യവയസ്ക മരിച്ച നിലയിൽ: മൃതദേഹത്തിന് നാലു ദിവസം പഴക്കം,

നീലേശ്വരം: മാസങ്ങള്‍ക്കു മുമ്പ് 'വീടും സ്ഥലവും വില്പന നടത്തിയ മധ്യവയസ്കയെ വാടക ക്വാർട്ടേഴ്സില്‍ മരിച്ച നിലയില്‍ കണ്ടെത്തി. ഇരിയ ഗുരുപുരത്തെ ഗംഗാധരന്‍റെ ഭാര്യ കാർത്യായനി(58) യെയാണ് ചാളക്കടവ് ഉണ്യംവെളിച്ചത്തെ ക്വാർട്ടേഴ്സില്‍ മരിച്ച നിലയില്‍ കണ്ടെത്തിയത്.

ഒരാഴ്ച മുമ്പാണ് ഇവർ ഒറ്റയ്ക്ക് ക്വാർട്ടേഴ്സില്‍ താമസിക്കാനെത്തിയത്. ആധാർ കാർഡും മറ്റു വിവരങ്ങളും അടുത്ത ദിവസം കൊണ്ടുവരാമെന്നാണ് പറഞ്ഞിരുന്നത്. 

തുടർന്നുള്ള ദിവസങ്ങളില്‍ ഇവരെ പുറത്തു കാണാതിരിക്കുകയും മുറിയില്‍ നിന്ന് ദുർഗന്ധം പരക്കുകയും ചെയ്തതോടെ ഇന്നലെ ഉച്ചയോടെ നാട്ടുകാർ മുറി തുറന്ന് പരിശോധിച്ചപ്പോഴാണ് നാലു ദിവസം പഴക്കമുള്ള മൃതദേഹം കണ്ടെത്തിയത്. കസേരയില്‍ ഇരുന്ന നിലയിലായിരുന്നു മൃതദേഹം. 

ഇരിയ ഗുരുപുരം പെട്രോള്‍ പമ്പിന് സമീപം കുടുംബസമേതം താമസിച്ചിരുന്ന ഇവർ ആറു മാസം മുമ്ബ് വീടും സ്ഥലവും വിറ്റതാണെന്നും മക്കള്‍ വിവിധയിടങ്ങളിലേക്ക് താമസം മാറിയതാണെന്നുമാണ് നാട്ടുകാരില്‍ നിന്നുള്ള വിവരം. ഭർത്താവ് ഒരു മകനൊപ്പം താമസിച്ചുവരികയാണ്. ഹേമകുമാർ, ഹേമേഷ്, ഹേമലത എന്നിവരാണ് മക്കള്‍.