പിറന്നാൾ കേക്കുമായി അർദ്ധരാത്രി 12 മണിക്ക് പെൺകുട്ടിയെ കാണാനെത്തിയ യുവാവിന് പെൺകുട്ടിയുടെ ബന്ധുക്കളുടെ ക്രൂരമർദ്ദനം...

പത്തനംതിട്ട: പിറന്നാൾ കേക്കുമായി പെൺകുട്ടിയെ കാണാൻ എത്തിയ യുവാവിനെ മർദിച്ചതായി പരാതി. 

പത്തനംതിട്ട കുമ്മണ്ണൂര്‍ സ്വദേശിയായ മുഹമ്മദ് നഹാസിനാണ് മർദനമേറ്റത്. കൊല്ലം തേവലക്കരയിലെ പെൺകുട്ടിയുടെ ബന്ധുക്കളാണ് നഹാസിനെ മർദിച്ചത്.

കഴിഞ്ഞ ദിവസം രാത്രി 12.15നാണ് യുവാവ് പതിനാറുകാരിയുടെ വീടിൻ്റെ കോമ്പൗണ്ടിലെത്തിയത്. പെണ്‍കുട്ടിക്ക് പിറന്നാൾ കേക്കുമായാണ് യുവാവ് ഇവിടെവന്നത്. എന്നാൽ ഇവിടെയെത്തിയ   യുവാവിനെ ബന്ധുക്കൾ മർദ്ദിക്കുകയായിരുന്നു. 

കാലിൽ കുരുക്കിട്ട് കെട്ടിത്തൂക്കി ക്രൂരമായി മർദ്ദിച്ചെന്ന് യുവാവ് പറയുന്നു. ടോർച്ച് കൊണ്ട് കണ്ണിലും തലയ്ക്കുമടിച്ചു. സോപ്പ് വെളളം ബലമായി കുടിപ്പിച്ചു. മുഖത്ത് മുളക് പൊടി വാരിത്തേച്ചു. 

തേങ്ങ തുണിയിൽ പൊതിഞ്ഞ് അടിച്ചതായും യുവാവിന്റെ പരാതിയിൽ പറയുന്നു. ഒടുവിൽ പോലീസ് എത്തിയാണ് മോചിപ്പിച്ചതെന്നാണ് യുവാവ് പറയുന്നത്.