ആകെ സ്ഥാനാര്‍ത്ഥികള്‍ 194 പേര്‍: വനിതാ സ്ഥാനാർത്ഥികൾ ഇല്ലാത്ത 6 മണ്ഡലങ്ങൾ; ഭീഷണിയായി അപരന്മാര്‍, കേരളം തിരഞ്ഞെടുപ്പ് ചൂടിലേക്ക്,

തിരുവനന്തപുരം: കേരളത്തിലെ 20 മണ്ഡലങ്ങളിലേക്കുള്ള ലോക്‌സഭാ തെരഞ്ഞെടുപ്പിനുള്ള അന്തിമ പട്ടികയില്‍ 194 സ്ഥാനാർത്ഥികളുണ്ടെന്ന് ചീഫ് ഇലക്ടറല്‍ ഓഫീസർ സഞ്ജയ് കൗള്‍  പ്രഖ്യാപിച്ചു.

അവസാന തീയതിയില്‍ പത്ത് സ്ഥാനാർത്ഥികള്‍ നാമനിർദ്ദേശ പത്രിക പിൻവലിച്ചു.കോട്ടയം മണ്ഡലത്തിലാണ് ഏറ്റവും കൂടുതല്‍ സ്ഥാനാർത്ഥികള്‍ (14), ആലത്തൂരില്‍ (5) കുറവ്.

കോഴിക്കോട് 13 പേരും കൊല്ലത്തും കണ്ണൂരും 12 പേർ വീതവുമാണ് മത്സരരംഗത്തുള്ളത്. ആകെയുള്ളവരില്‍ 25 പേർ സ്ത്രീകളും 169 പേർ പുരുഷന്മാരുമാണ്. വടകര നിയോജക മണ്ഡലത്തിലാണ് ഏറ്റവും കൂടുതല്‍ വനിതകള്‍ മത്സരിക്കുന്നത് (4).

പത്തനംതിട്ട, മാവേലിക്കര, കോട്ടയം, തൃശൂർ, മലപ്പുറം, കണ്ണൂർ എന്നിങ്ങനെ ആറ് മണ്ഡലങ്ങളാണ് വനിതാ സ്ഥാനാർത്ഥി ഇല്ലാത്തത്.