കൊച്ചി: കോണ്‍ഗ്രസ് വിടാൻ സിപിഎം നേതാക്കള്‍ സമീപിച്ചെന്നും ദല്ലാള്‍ നന്ദകുമാർ ചർച്ച നടത്തിയെന്നുമുള്ള കെപിസിസി ജനറല്‍ സെക്രട്ടറി ദീപ്തി മേരി വർഗീസിന്‍റെ വെളിപ്പെടുത്തലില്‍ പുതിയ വഴിത്തിരിവ്.
.jpeg)
പത്മജയുമായി സിപിഎം നേതാവ് ഇ.പി. ജയരാജൻ ചർച്ച നടത്തിയെന്നും ദല്ലാള്‍ നന്ദകുമാർ ഇടനിലക്കാരനായി എന്നുമുള്ള വാർത്ത രാഷ്‌ട്രീയ കേരളം ഏറെ ചർച്ച ചെയ്തതിന് പിന്നാലെയാണ് ദീപ്തിയും വെളിപ്പെടുത്തലുമായി രംഗത്തെത്തിയത്. തൃക്കാക്കര ഉപതെരഞ്ഞെടുപ്പ് സമയത്ത് സിപിഎമ്മിലേക്ക് ക്ഷണിച്ചുവെന്നായിരുന്നു ദീപ്തിയുടെ വാദം.
എന്നാല്‍, ദീപ്തി മേരി വര്‍ഗീസിന്‍റെ വാദം തള്ളി ടി.ജി.നന്ദകുമാര്‍ രംഗത്തെത്തി. താന്‍ ദീപ്തിയെ വിളിച്ചത് തൃക്കാക്കര സ്ഥാനാര്‍ഥി പ്രഖ്യാപനത്തിനുശേഷമാണ്. ഇതിനുശേഷം ദീപ്തി ഇ.പി. ജയരാജനെ കണ്ടുവെന്നും നന്ദകുമാർ പറഞ്ഞിരുന്നു. എന്നാല്‍, ഈ ആരോപണങ്ങള്‍ ദീപ്തിയും തള്ളി.
ദീപ്തി മേരി വർഗീസ് തൃക്കാക്കരയില്‍ ഇടതുമുന്നണിക്ക് അനുകൂലമായി വോട്ട് മറിച്ചെന്നും നന്ദകുമാർ ആരോപിച്ചു. ആരോപണം ദീപ്തി തള്ളിക്കളഞ്ഞാല്‍ തെളിവുകള്‍ പുറത്തുവിടുമെന്നും നന്ദകുമാർ വെല്ലുവിളിച്ചിട്ടുണ്ട്.
എന്നാല്‍, നന്ദകുമാറിന്‍റെ ആരോപണങ്ങള്‍ ശരിവയ്ക്കുകയാണ് തൃക്കാക്കരയിലെ പാർട്ടി പ്രവർത്തകർ. തൃക്കാക്കരയില്‍ സ്‌ഥാനാർഥിയാകാൻ ദീപ്തി ആഗ്രഹിച്ചിരുന്നുവെന്നും, സാധിക്കാതെ വന്നപ്പോള്‍ പ്രവർത്തനത്തില്‍ ആത്മാർഥതയുണ്ടായിരുന്നില്ലെന്നും പ്രവർത്തകർ ചൂണ്ടിക്കാട്ടുന്നു. അന്ന് തന്നെ പാർട്ടി നേതൃത്വത്തെ വിവരം അറിയിച്ചിരുന്നതായും പ്രാദേശിക നേതാക്കള്‍ പറയുന്നു.
ദീപ്തിയെ തത്കാലം ന്യായീകരിക്കേണ്ട എന്നാണ് കെപിസിസി നേതൃത്വത്തിന്‍റെയും നിലപാടെന്നറിയുന്നു. നേതൃത്വത്തിനും ഇക്കാര്യത്തില്‍ ചില സംശയങ്ങള്‍ ഉള്ളതായാണ് സൂചന. പത്മജയുമായി ഇ.പി. ജയരാജൻ ചർച്ച നടത്തിയ വാർത്ത പുറത്തു വന്നതിനു തൊട്ടു പിന്നാലെ ദീപ്തി രംഗത്ത് വന്നതില്‍ അസ്വാഭാവികത ഉണ്ടെന്ന് തന്നെയാണ് കോണ്‍ഗ്രസ് നേതാക്കളുടെ സംശയം.
എന്നാല്‍, തത്കാലം മൗനം പാലിക്കാനാണ് നേതൃത്വത്തിന്‍റെ തീരുമാനം. മറ്റൊരു വനിതാ നേതാവ് കൂടി പാർട്ടി വിടുന്ന സാഹചര്യം ഒഴിവാക്കുന്നതാകും തത്കാലത്തേക്ക് നല്ലതെന്നാണ് മുതിർന്ന നേതാക്കളുടെ നിലപാട്. കൊച്ചിയില്‍ നടന്ന യുഡിഎഫ് തെരഞ്ഞെടുപ്പ് കണ്‍വൻഷനില്‍ വേദിയില്‍ മുൻനിരയില്‍ തന്നെ ഉണ്ടായിരുന്നിട്ടും പ്രസംഗിച്ച ഒരു നേതാവ് പോലും ദീപ്തിയുടെ പേര് പറയാൻ തയാറായില്ല. പ്രതിപക്ഷ നേതാവും ദീപ്തിയെ കാര്യമായി ഗൗനിച്ചില്ല.
ഇത്തരത്തില്‍ ആരോപണങ്ങളുന്നയിച്ച്‌ ഹരാസ് ചെയ്യാനാണ് ശ്രമിക്കുന്നതെങ്കില്‍ തുടർ നടപടികളെക്കുറിച്ച്‌ പാർട്ടി നേതൃത്വവുമായി ആലോചിക്കേണ്ടി വരും. എ.ഐ.സി.സി അംഗമായ എനിക്ക് ഇക്കാര്യത്തില്‍ തനിച്ചൊരു തീരുമാനമില്ലെന്നും പാർട്ടി നേതൃത്വവുമായി ആലോചിച്ച്‌ മാത്രമേ മുന്നോട്ട് പോവുകയുള്ളൂവെന്നും ദീപ്തി പറഞ്ഞു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.