മലപ്പുറത്ത് വീട്ടിൽ സൂക്ഷിച്ച തണ്ണിമത്തൻ പൊട്ടിത്തെറിച്ചു: സാമ്പിൾ ശേഖരിച്ച് പരിശോധന ,

മലപ്പുറം : പൊന്നാനിയിൽ കടയിൽനിന്ന് വാങ്ങി വീട്ടിലെ അടുക്കളയിൽ വച്ചിരുന്ന തണ്ണിമത്തൻ പൊട്ടിത്തെറിച്ചു. പുതുപൊന്നാനി നാലാംകല്ലിൽ ചാമന്റകത്ത് നസ്‌റുദീന്റെ വീട്ടിലാണ് സംഭവം.ഞായറാഴ്ച ഉച്ചയ്‌ക്ക് എം.ഇ.എസ്. കോളേജിനുസമീപത്തെ കടയിൽനിന്ന് വാങ്ങിയതാണ് തണ്ണിമത്തൻ. തിങ്കളാഴ്ച രാവിലെ പത്തരയോടെയാണ് പെട്ടിത്തെറിച്ചത്.

ശബ്ദംകേട്ട് വീട്ടുകാർ ഓടിയെത്തിയപ്പോഴാണ് തണ്ണിമത്തന്റെ അകത്തെ ഭാഗങ്ങൾ ചിതറിത്തെറിച്ചനിലയിൽ കണ്ടത്. ദുർഗന്ധവുമുണ്ടായിരുന്നു.

വിവരമറിഞ്ഞ് നഗരസഭയിലെ ആരോഗ്യവിഭാഗവും ഭക്ഷ്യസുരക്ഷാ ഉദ്യോഗസ്ഥരുമെത്തി പരിശോധന നടത്തി. തണ്ണിമത്തൻ വാങ്ങിയ കടയിൽനിന്ന് സാമ്പിൾ ശേഖരിച്ച് പരിശോധനയ്‌ക്കയച്ചിട്ടുണ്ട്